မှတ်မှတ်ရရ အဲဒီတုန်းက ကျွန်တော်နဲ့ ကစ်တီ ပြတ်ကာစ။ ကစ်တီက ကျွန်တော့်ကို ထားသွားသည်။ ကျွန်တော်က ကစ်တီကိုချစ်သည်။ ဒီတော့လည်း လူမှာ ဒီအသက်ဒီအရွယ်ကြီး ကျကာမှ အသည်းကွဲတာပေါ့လေ။ အသက်ကြီးမှ အသည်းကွဲရတာဟာ အရွယ်လင့်မှ အံဆုံးထွက်တဲ့ ကိစ္စလိုပဲဗျ၊ ပြောပြရင်လည်း ဘယ်သူမှ ယုံမှာမဟုတ်သလို၊ ခံစားရတဲ့ ဒုက္ခကြောင့်လည်း လူမှာ ဒေါသက အလိုလိုထွက်နေတတ်တာကလား။
ဒါနဲ့ ဇာတ်လမ်းကို တိုအောင်ပြောရရင် စားလည်းဒီစိတ်၊ သွားလည်း ဒီစိတ်နဲ့ ကစ်တီပြီး ကစ်တီဖြစ်နေလိုက်တာ၊ ဆိုင်ကယ်မောင်းရင်း ကစ်တီ့အကြောင်းတွေးမိတော့ လမ်းလေးခွဆုံမှာ တစ်ဖက်က ဆိုင်ကယ်နဲ့ တိုက်မိကြပါရော။ ဘယ်လိုက ဘယ်လိုဖြစ်တယ်မသိပါဘူး။ “အုန်း” ခနဲ့၊ “ဂွမ်း” ခနဲ့ကြားလိုက်ရပြီး နှစ်စင်းလုံး ဂျွမ်းထိုးမှောက်ခုံ ဖြစ်သွားတော့တာပါပဲ။ ဒါနဲ့ ကိုယ့်ဆိုင်ကယ်ကိုယ် ကုန်းရုန်းဆွဲထူနေတုန်း အသံကြားလိုက်ရတယ်။
“မင့်မေရိုးတဲ့မှ…”
နားစွန်နားဖြားပေမယ့် ဒေါသက ထောင်းခနဲ့ထွက်သွားတယ်။ ကိုယ်နဲ့တိုက်မိတဲ့ ကောင်က ဆဲနေတာ။ သူ့ကြည့်ရတာ ဒေါသလည်း အတော်ထွက်နေပုံ။ နောက်ကပါလာတဲ့ သူ့မိန်းမက သူ့လင်ကို ဆွဲနေတယ်။ အောင်မယ် အေဘေးမျိုးဟာ ဆွဲလေ ကဲလေဗျ။ ကျွန်တော့်ကို ထိုးပါမယ် ကြိတ်ပါမယ်တကဲကဲ။ လူက ကျွန်တော့်ထက် နည်းနည်း အသက်ကြီးမယ်။ ဗလတောင့်တောင့်၊ တက်တူးမည်းမည်းနဲ့ မိန်းမရှေ့မို့ ခပ်ကဲကဲ။ ကျွန်တော်လည်း သူ့ကြည့်ပြီး ဘာမှမတွေးနိုင်တော့ဘဲ လွတ်ထွက်သွားတယ်။ အဲဒါ ပါလာတဲ့ ဆိုင်ကယ်ဦးထုပ်ကြိုးတင်းနေအောင်ကိုင်တဲ့ပြီး အဲဒီကောင်ကို ပိတ်ရိုက်ပစ်မိတော့တာပဲ။ သတိဝင်တော့ အေဘေးမျိုးဟာ ဆိုင်ကယ်ဘေးမှာ လဲနေပြီ။ သူ့မိန်းမဆိုတာလည်း အော်ဟစ်နေတာ ကမ္ဘာပျက်လို့။ နောက်တော့ ရပ်ကွက်ထဲကလူတွေထွက်လာ၊ ရဲစခန်းရောက်ပေါ့။ ဒီထုံးစံတွေရိုးခဲ့မို့ စိုးလှမရှိပါဘူး။
စခန်းရောက်တော့ တကယ်လို့ အမှုဖွင့်ခဲ့ရင် ဘယ်လိုတွေဖြစ်လာနိုင်တယ်ဆိုတာနဲ့၊ တရားရုံးရောက်ရင် ဘယ်လိုဆိုတဲ့အကြောင်းကို စခန်းထဲက ရဲတွေရှင်းပြအပြီးမှာ တစ်ဖက်ကလည်း တော်တော်စိတ်ညစ်သွားပုံပါ။ သူ့မိန်းမက အကျယ်အကျယ် မဖြစ်ရအောင် အမှုကိုမဖွင့်ချင်တော့ဘူးတဲ့။ ဟိုအေဘေးမျိုးကတော့ သူ့ထုံးစံ မိန်းမကြောင့်ပဲ လျှော့ရသလိုလို တအင်အင်။ ကျွန်တော်က ဒေါသထွက်နေသေးတာ။ ဘာလို့ဆို စောစောကသာ ဒေါသနဲ့မို့ ကိုယ်ကချည်း လုပ်ရတယ်ထင်တာ၊ တကယ့်တကယ် သွေးအေးလာတော့မှ နှုတ်ခမ်းက ငံငြိငြိစိုစွတ်စွတ်ခံစားမှုနဲ့ မျက်နှာတစ်နေရာက နာကျင်မှုတွေခံစားလာရချိန် ဒီကောင့်အပေါ် ဒေါသက ပြန်ထွက်လာသေးတာ။
ကိစ္စဝိစ္စတွေပြီးတော့ ဗိုလ်ကြီးစည်သူဝင်းဆီဖုန်းဆက်မိတယ်။
“ကျုပ်ရန်ဖြစ်လို့ ဘဲကြီး”
သူက ပြာပြာသလဲ ပြန်မေးတယ်။
“ဟာ… ဘယ်မှာလဲ၊ အခု လာခဲ့ရမလား”
“မလာနဲ့တော့၊ သောက်နေကျဆိုင်က စောင့်နေဗျာ၊ ကျွန်တော်အခုလာခဲ့မယ်”
ဒီလိုနဲ့ သူနဲ့ နေ့ခင်းကြီး သောက်ဖြစ်ကြသေးတယ်။ နောက်တော့ ရန်ဖြစ်ခဲ့တာတွေမေ့ပြီး ကျွန်တော်က ကစ်တီ့အကြောင်းတွေပြောရင်း သတိရ ဝမ်းနည်းလာမိတယ်။ အခုနေပြန်တွေးကြည့်တော့ ကိုယ်ကသာ အဲဒီတုန်းက စွတ်စက်ခံစားပြနေမိတာ၊ မျက်နှာချင်းဆိုင်က မျက်နှာတည်နဲ့ထိုင်နေတဲ့ဘဲဟာ နားရောလည်လား မသိပါဘူးဗျာ။ ကျွန်တော်ပိုမပြောကြောင်း နောက်ပိုင်း ဆက်ရေးပြမယ့် အကြောင်းအရာတွေက သက်သေခံကြပါလိမ့်မယ်။
ခဏနေတော့ သူနဲ့တစ်ပတ်စဉ်ထဲ ကိုရဲရင့်ပါ ရောက်လာပါရော။ ကျွန်တော်က သူ့ရှေ့မှာတင် ကစ်တီ့အကြောင်း ခံစားပြနေတာကို မျက်နှာသေကြီးနဲ့ ခပ်တည်တည်ကြီး နားထောင်နေရင်းက ဘယ်လိုကဘယ်လို သင်းတို့ချင်း ‘ချိန်း’ လိုက်ကြတယ် မသိပါဘူး။ ပြောရဦးမယ်ဗျ။ စစ်သားတွေအကြောင်း။
ကိုစည်သူဝင်းက အိမ်ထောင်သည်။ ကလေးတစ်ယောက်အဖေ။ သူက အပြင်ထွက်ရင် ဘယ်တော့မှ မိန်းမကိုမခေါ်ဘူး။ အကြောင်းအမျိုးမျိုးပြပြီး အိမ်ထားခဲ့တာပဲ။ အဲ… ညနေ ညနေဆိုရင်တော့ တောင်ဘက်ကျုံး ၇၃ လမ်းပေါက်က ကစားကွင်းမှာ သူ့ကလေးကိုလက်ဆွဲပြီး လမ်းလျှောက်နေတာဖြစ်ဖြစ်၊ ကလေးကို မပင်ပန်း ပင်ပန်းရအောင် ကစားခိုင်းနေတာဖြစ်ဖြစ် တွေ့ရမယ်။ ကလေးကို ချစ်လှချည်ရဲ့ မထင်ပါနဲ့ခင်ဗျာ။ စစ်သားမို့ သားလေး ကျန်းမာသန်စွမ်းအောင် လေ့ကျင့်ပေးတယ်လည်း အထင်မမှားပါနဲ့ခင်ဗျာ။ အဲဒါ… ညညကျ ဒီကောင်လေး စောစောအိပ်အောင် ကြံဆောင်တာတဲ့ခင်ဗျာ။ သူ့ပါးစပ်ကပြောလို့ ကျွန်တော်သိရတာ။
“ကိုအောင်မျိုး၊ အဲဒါ ကျွန်တော်တို့ စစ်တပ်နည်း” တဲ့။ ညပိုင်းတော့ မိန်းမကို သိပ်ချစ်။ ကလေးစောစောအိပ်အောင် လုပ်ပြီးကို အချိန်ပေးတာ။ အို… ဘယ့်နှာကြီးပါလိမ့်။
ကိုရဲရင့်ကျ တစ်မျိုး။ သူက လူပျို။ ရှားရှားပါးပါး မိန်းမလှလှလေးတစ်ယောက် ချစ်သူရထားတယ်။ ဒီတော့ သင်းစတိုင်ကကျ တကယ့် “သူခိုးရွေရ တပြပြ” သွားလေရာခေါ်တယ်။ ယုတ်စွအဆုံး ညည အရက်ဆိုင်ထိုင်ရင်တောင် သူ့ကောင်မလေးပုံ ဝေါပေပါ တင်ထားတဲ့ ဖုန်းကို စခရင်ပိတ်မသွားအောင် ဆက်တင်ချိန်ပြီး စားပွဲပေါ်ချထားကာ ကြွားတတ်တဲ့အမျိုး။ ဒါကျ သူတို့စစ်တပ်က လူပျိုစစ်သား အထာတဲ့ဗျာ။ ဘယ့်နှာ့ လူတွေမြန်းကို မသိပါဘူး။
အခုလည်း နေ့ခင်းကြီး ကျွန်တော်တို့သောက်တဲ့ဆိုင် သူရောက်လာတော့ သူ့ကောင်မလေးပါ ပါတာပ။
“ညီလေးတို့ ငါတို့နဲ့ လိုက်ခဲ့ကြ။ အခုမှ နေ့ခင်းကြီးရှိသေးတာ၊ မသောက်ကြနဲ့။ မင်းအစ်မက ငါ့ကိုအခု ဖိနပ်လိုက်ဝယ်ပေးမလို့တဲ့။ အဲဒါ အပြန်ကျရင် မင်းတို့စားချင်တာ ကျွေးမယ်လည်း ပြောတယ်”
တကယ်ဆို ကိုရဲရင့်ဆိုတာ ကျွန်တော်နဲ့ ရွယ်တူဖြစ်ပြီး၊ သူ့ကောင်မလေးဟာ အခုရှိလှမှ အသက် ၂၃၊ ၂၄ အာဏာကုန်ပေါ့။ ဒါကို သူကပဲ ကိုယ့်ထက်ကြီးသလိုလို၊ အဲဒီလို ကြီးတာကြောင့်ပဲ အလိုလို ဟိုသူနဲ့တွဲနေတဲ့ ၂၃၊ ၂၄ နှစ်လောက် ကလေးမဟာ ကိုယ့်အစ်မအရွယ် ဖြစ်သွားသလိုလို ပြောတတ်တာလည်း သူတို့ စစ်သားအထာပဲဗျ။ အိုဗျာ၊ တကယ့်ကို ဘယ်နှာ့လူတွေမြန်း မသိပါဘူးဆိုမှ။
သူက အစ်မဆိုတော့လည်း အစ်မပေါ့လေ။ ဒါနဲ့ စိတ်ညစ်ညစ်နဲ့ သူ့ကားပေါ်တက်ပြီး၊ သူခေါ်ရာပါခဲ့ကြတယ်။
ကျွန်တော်အမှတ်မလွဲရင် ၂၇ လမ်း၊ ဈေးချိုအရှေ့လောက်ဗျ။ ကိုယ်တော်နဲ့ မမဟာ လမ်းဘေးကားရပ်ပြီး ကော့ပက်ကော့ပက်နဲ့ ဖိနပ်အဝယ်ထွက်ကြတယ်။ ကျွန်တော်နဲ့ ဟိုလူပဲ ကားထဲကျန်ခဲ့တော့ ပူကပူ၊ အိုက်ကအိုက်သနဲ့မို့ ကားထဲကထွက်ပြီး ခပ်လှမ်းလှမ်းက ကွမ်းယာဆိုင်ဘေး ကွမ်းလေးမြုံ့ရင် ဟိုအတွဲပြန်အလာ စောင့်ရတယ်။
“ပွမ်”
“ပွမ်”
“ပွမ်”
တပွမ်ပွမ်နဲ့ နားဆူလှပါတယ် အောက်မေ့တာ၊ စောစောက ကျွန်တော်တို့ကားရပ်ထားခဲ့တဲ့ နေရာက ဖြစ်နေတာကိုး။ ကိုယ်တော်ချောက ကားကို သူများအိမ်အဝင်ပေါက် ပိတ်ရပ်ထားခဲ့တာ။ အဲဒါ အိမ့်ရှင်ပြန်လာတော့ သူ့ကားဝင်မရလို့ ဒေါသဖြစ်နေပါကော။ ဒါနဲ့ ဟွန်းတွေလှိမ့်တီးပြီး သူ့ဒေါသကို ပြနေတာကလား။ ဒါနဲ့ ကျွန်တော်က သွားပြောရတယ်။
“ကားသမားက ဈေးသွားဝယ်တယ်ဗျ၊ ကျုပ်လည်း ကားမမောင်းတတ်ဘူး။ အဲဒါ ရွှေ့ချင်ရင်တော့ သော့တန်းလန်းရှိတယ်၊ ကိုယ့်ဟာကိုယ်ရွှေ့လိုက်”
ဘိုးတော်ဟာ တရုတ်ဗျ။ ဒီတော့ တရုတ်လို “ညိ ရှောက်ပင်တက်၊ ငါသံရာပင်တက်မယ်” တွေ လုပ်ပါရော။ နားမလည်ပေမယ့် ဆဲတယ်ထင်လို့ ဒေါသတော့ နည်းနည်းထွက်တယ်။ ဒါတင်ဘယ်ကမတုန်း။ ဘိုးတော်ဟာ ကားကိုလွတ်ရာရွှေ့ပြီးချိန် ကားတံခါးကို သိသိသာသာ စောင့်ပိတ်တယ်ဗျ။
“မအေရိုးကြီး မရိုင်းနဲ့ ရီးပဲ….” ကစပြီး ကျွန်တော်နဲ့ ရန်ဖြစ်တော့တာပဲ။
ပြောရဦးမယ်ဗျ စစ်သားတွေအကြောင်း။ အခုက ရန်ဖြစ်တာထက် အတူပါ စစ်ဗိုလ်ကြီးတွေအကြောင်း ပြောချင်တာရယ်။
ကျွန်တော်က အစတော့ ကားတံခါးစောင့်ပိတ်ပြီး တရုတ်လိုဆဲတဲ့ အေပေးကြီးကို ဆော်မလို့ပဲ။ မနက်က ရန်ဖြစ်ထားတဲ့ အခံလေးကလည်းရှိ၊ အရည်လေးလည်း ဝင်ထားတော့ စိတ်က လုပ်ချင်နေတာရယ်။ လက်ထဲပါလာတဲ့ ဖုန်းစောင်းနဲ့ သူ့ထုပစ်မလို့ သူ့အနားကပ်တော့ အေပေးကြီးက အိမ်ထဲဇွတ်ဝင်ပြေးတယ်။ သူပြေးမှသေချာကြည့်မိ သိလိုက်ရတာ၊ အဲဒီဘဲကြီးက တော်တော်အိုနေပါပြီ။ တော်ပါကွာဆိုပြီး ရန်ဖြစ်ဖို့ စိတ်မပါတော့ဘဲ လှည့်ထွက်လာချိန် သူ့မိန်းမ တရုတ်မက သတ္တိကောင်းကောင်းနဲ့ ထွက်လာပါရော။
ဘယ့်လောက် ကံဆိုးတဲ့ ကျွန်တော်ပါလဲခင်ဗျာ။ အဖိုးကြီးဝင်သွားလို့ တပ်ကူထွက်လာတာ မိန်းမတဲ့။
အခု စာနဲ့ရေးပြတော့ နည်းနည်းစာကြမ်းသလိုဖြစ်ပါမည်။ သို့သော် အပြင်မှာရန်ဖြစ်နေသောအချိန် အဆဲစကားတို့မှာ မဆန်းလှပါ။ ကျွန်တော်သည် ကျွန်တော့်ကို ရိုက်မည်ပြေးလာသော တရုတ်မိန်းမကို ငြိမ်ငြိမ်နေဖို့ အဆဲလေးနဲ့ပြောပြီး တွန်းထုတ်လိုက်ပါသည်။ သို့သော် ကံဆိုးမသွားရာ မိုးလိုက်လို့ ရွာပြီတည်း။ သူတို့သား တရုတ်လေး ဆယ်တန်းသာသာအရွယ်၊ တက္ကသိုလ်ကျောင်းသားပေါက်စလောက်ကပါ တုတ်ကလေးကိုင်လို့ ထွက်လာပြန်ရဲ့။ ကဲ… ဘယ်မျှကံဆိုးသော ကျွန်တော်ပါနည်း။ နံပါတ်တစ်က အဖိုးကြီး၊ နံပါတ်နှစ်က မိန်းမ၊ နံပါတ်သုံးက လူပျိုပေါက်ကောင်လေး။ သင်းတို့လိုဟာမျိုးတွေနဲ့ အဘယ်သူသည် ရန်ဖြစ်ချင်ပါမည်နည်း။ ကိုယ်ကလုပ်လိုက်ရသော် ပတ်ဝန်းကျင်မှ သောက်ကျိုးနည်း ဝိုင်းအပြစ်တင်ကြမည်ဖြစ်သလို၊ ကိုယ်ခံရပါကလည်း ဘယ်နှယ့်မှ မျက်နှာမလှသော ကိစ္စကြီး။
မိန်းမတို့သည် အဆဲသန်သလောက် မိုက်ရူးရဲဆန်ကြ၏။ လူပျိုးပေါက်ကလေးကလည်းကလည်း သူ့ကိုယ်သူ နိုင်ချင်ကြက်အမှတ်နဲ့ ခွပ်ပါမယ် တကဲကဲ။ ဒါထဲ အဖိုးကြီးက သူ့မိတ်ဆွေဖြစ်ဟန်ရှိသော သူ့ဘေးအိမ်ထဲ စစ်ကူခေါ်သလိုတကြည့်ကြည့်။ ကျွန်တော်စိတ်တိုလာပြီး
“မအေရိုးကြီး လာထွက်ခဲ့ကွာ” ဆိုကာ ကလော်ထုတ်မိတော့သည်။
သတိထားမိတော့ ပတ်ဝန်းကျင်ကြီးတစ်ခုလုံးက ကျွန်တော့်ကို ဝိုင်းကြည့်လှပြီ။ ဟိုအိမ်သည်အိမ် အိမ်နီးချင်းတွေက ကိုယ့်ကို လူဆိုးကြီးလိုလို မျက်စိစပါးမွေးစူးကြသော အထာတွေနှင့်။ သို့သော် တကယ့်လူဆိုးကြီးမဟုတ်သော ရည်းစားပူမိဆိုးဆိုးသည့် ကျွန်တော်က သူတို့ရပ်ကွက် လူအင်အားကို သတိထားမိချိန် နည်းနည်းတော့ ဖြုံလာပါသည်။ ဒီတော့ အတူပါသူ ကိုယ့်ဗိုလ်ကြီးကို သတိရမိသပေါ့။ သူဆိုတာ ဗိုလ်ကြီး။ တိုက်နည်းခိုက်နည်းတွေ သိမှာပေါ့။ အဲဒါနဲ့ လှည့်ကြည့်မိတာ ကိုယ့်လူဟာ ကိုယ့်ကို ‘ဖုတ်လေတဲ့ငပိ ရှိတယ်လို့မှ မထင်’ သူ့ဖုန်းသူကြည့်ရင်း ကွမ်းယာဆိုင်ရှေ့ ထိုင်လို့။ အဲဒီ အချိန် ကျွန်တော့်ကို လှည့်မကြည့်တာဆိုလို့ သူတစ်ယောက်ပဲ ရှိတယ်။
တကယ့်ကို ကိုင်ဇာရဲ့ “အို့… နေနိုင်သူကြီး နေနိုင်သူကြီး နေနိုင်သူကြီးရယ်” လို့ အော်ဆိုရမယ့်အပေါက်။
သူတင်ပဲလားဆိုတော့ ကိုရဲရင့်ကိုလည်း ကြည့်ပါဦးဗျာ။ အဲဒီလို ကျွန်တော်တို့ ဖြစ်နေကြရင်း မတ်တပ်၊ တစ်ယောက်ကပုခုံး၊ နောက်တစ်ယောက်ကခါး ကနွဲ့ကလျ ဖတ်ထားကြတဲ့ ဖိနပ်ဝယ်စုံတွဲ ပြန်လာပါရော။
“ကဲ… လာလာ ညီလေးတို့ တက်ကြ၊ သွားမယ်” တဲ့။ ဒါပဲ ပြောတယ်။
ဟိုတရုတ်မိသားစု ဆဲနေတာလည်း သူမသိဘူး။ ရပ်ကွက်က ကိုယ့်ကိုဆော်မယ်လုပ်နေတာလဲ သူမသိဘူး။ သူသိတာ သူ့ဘေးက ကောင်မလေးနှုတ်ခမ်းစူနေတာပဲ တဲ့။ အဲဒါ တကယ်ပြောတာ။ ကားပေါ်ရောက်တော့
“မင်းတို့အစ်မဟာကွာ၊ ဒီလောက်လေး လမ်းလျှောက်ရတာကို နေပူတော်မူလို့တဲ့၊ စိတ်ကောက်နေသေးတယ်” တဲ့။ ပြောပုံက။ (အဲဒီနေ့က သူတို့စုံတွဲ ဖိနပ်ဝယ်ထွက်တာ၊ အနည်းဆုံးတစ်နာရီခွဲလောက်ကြာမယ်။ ဖိနပ်တော့ စိတ်ကြိုက်မတွေ့လို့ မဝယ်ခဲ့ဖူးတဲ့ဗျာ။ ယောက်ျားစီးကတ္တီပါဖိနပ်ကို အဲဒီလောက် ရွေးရမှန်း ကျွန်တော့်တစ်သက်နဲ့တစ်ကိုယ် သူတို့နဲ့မှပဲ အဲဒီတစ်ခါ ကြားဖူးတယ်။)
ကျွန်တော်က မနေနိုင်တော့ဘူး။ ကိုစည်သူဝင်းကြီး စိတ်တိုတာနဲ့ ပြောမိတယ်။
“ခင်ဗျားဗျာ အတော်နေနိုင်တဲ့လူ။ ဒီလောက် ရုန်းရင်းဆန်ခတ်ဖြစ်နေတာတောင် ထလာဖော် မရဘူး၊ ကျုပ်က ခင်ဗျားအားကိုးနဲ့ ကျဲနေတာ” ဆိုတော့
“ကျုပ်ဒီမှာ ကန်ဒီခရပ်(Candy Crush) ဂိမ်းဆော့နေတာ လယ်ဘယ် ၁၄၅ အောင်ခါနီးနေပြီဗျ၊ ခင်ဗျား ရန်ဖြစ်တာက ခင်ဗျားလိုဒေါသမျိုးနဲ့လူ ဘယ်သူမှ ထွက်မလုပ်ရဲတာ ကျုပ်သိနေသား” တဲ့။
ဒီလူနှစ်ယောက်ကိုကြည့်ပြီး ကျွန်တော့်မှာ အဲဒီနေ့က ဒေါသတွေလည်း ပြေကရော။ အသည်းကွဲတာလည်း ပျောက်ကရော။ အဲဒါ ဥတုဘောဇနကျမ်းရဲ့ အာဘော်နဲ့ ပြောရရင်
“အို… အမျိုးသားတို့၊ အသည်းကွဲသော် မခက်လား၊ ဗိုလ်ကြီးများနဲ့ ပေါင်းသော် မပျောက်လား” ဟု ဆိုရမည်ပင်။ တိုင်းပြည်ကြီးပျက်နေတာပင် တယောထိုးမပျက်သလို သူစော်လေး နေပူမှာစိုးသော ဗိုလ်ကြီးရယ်၊ ပေါင်မုန့်မရှိလို့ ဆူပူမနေဘဲ ကိတ်မုန့်စားပေါ့ဟု အပြစ်တင်ရက်သူ ကန်ဒီခရပ်ဂိမ်းလယ်ဘယ် မပျက်ချင်သော ဗိုလ်ကြီးရယ်၊ ဪ… ကျွန်တော်ချစ်ရသော စစ်သားသူငယ်ချင်းများအကြောင်း ပြောပါတယ်။
အောင်မျိုးသူလွင်
၁၆၊၀၆၊၂၀၁၈
စနေ
ညနေ ၀၃း၀၈
No comments:
Post a Comment