ကြည်နုခေတ်နှင့် တွေ့ဆုံခြင်း
စာရေးဆရာမ ကြည်နုခေတ် မန္တလေးကို လာတယ်ဆိုတော့ ကျွန်တော့်မှာ အပြေးအလွှား သွားတွေ့ဖို့ပြင်ရပါတယ်။ ကျွန်တော်က သူ့ကဗျာတွေ စာတွေဖတ်ပြီး နှလုံးသားကို အာဟာရ ဖြည့်နေသူလေ။ ဆရာမရဲ့ ဖေ့ဘွတ်စာမျက်နှာမှာ မြန်မာ့ရိုးရာ စောင်းကောက်ကြီးကို မျောက်အုန်းသီးရသလို ချစ်စဖွယ် ကိုင်တွယ်သုံးသပ်နေပုံလေး တက်လာတော့ ကျွန်တော်ဟာ ပထမဆုံး နှစ်သက်သဘောကျသူအဖြစ် မှတ်တမ်းဝင်နိုင်ဖို့ လိုက်ဘတ်တွန်ကို အပြေးအလွှား နှိပ်သော်ငြား မိမိထက် လက်သွက်သော ကဗျာဆရာ ငကျော်စွာက ဦးသွား၍ ဒုတိယနှင့်သာ ကျေနပ်ခဲ့ရလေသည်။ ဤသည်မှာ ကျွန်တော်၏ ဆရာမအပေါ်ထားသော လေးစားချစ်ခင်စိတ်ကို ဖော်ပြသော ဥပမာတစ်ခုမျှသာ ဖြစ်ပါသည်။
ဆရာမတည်းခိုသော တည်းခိုခန်းသို့ ရောက်ပြီး ကျွန်တော်လာရောက်တွေ့ဆုံကြောင်း စကားပါးပြီးသည်၏ အခြားမဲ့၌ ဆရာမ တောက်တိုခိုင်းရန်ခေါ်လာဟန်ရှိသော ပုံမကျ ပန်းမကျ အသားဖြူဖြူ အမျိုးသမီး တစ်ယောက် ကျွန်တော့်ရှေ့သို့ ရောက်လာရာ ကျွန်တော်မှာ အရှင်မနှင့် တွေ့ရန်လာသူသည် အစေခံကို အဖက်လုပ်ရိုးမရှိ သကဲ့သို့ ထို အမျိုးသမီးအား သာမာန်ကာလျှံကာမျှပင် ကြည့်ရှုသုံးသပ်ပြီး
"ဆရာမ ကြည်နုခေတ်က ဆင်းမလာသေးဘူးလား"ဟုသာ မေးမိပါသည်။
"ဒမာ၊ ကြည်နုခေတ်ဆိုတာ ကျုပ်ပဲဗျ" ဆိုတော့မှ ကျွန်တော်သည် အပြေးအလွှား အားနာသွားမိ၏။
"အာ ဆရာမရာ အားနာလိုက်တာ၊ ကျွန်တော်က သည်ရုပ် သည်ရည်နဲ့ဆိုတော့ ဆရာမကို ဆရာမလို့မထင်ပဲ၊ ဆရာမခိုင်းတဲ့ အဒေါ်ကြီး မဟုတ်ရင် သည်တည်းခိုခန်းက အိပ်ယာခင်းလျှော်တဲ့ မိန်းမကြီး များလားဆိုပြီး"
"တော်တိတ် ပေါက်ကရတွေ၊ စာရေးဆရာမဆိုတာ သည်ပုံသည်ပန်း မရှိလို့ ခေါင်းမှာချိုပေါက်ရင်ပေါက်၊ မပေါက်ရင် နင့်လို ဘုရားရွှေပွတ်မယ့် ဂေါပကလိုလို ပုံပေါက်နေရမလားဟဲ့ ငနာကောင်ရဲ့"
ကျွန်တော်သည် အင်မတိအင်မတန် အားနာသွားရင်းက၊ စကားပြေပြောရင်း မိမိကိုယ်ကို မိတ်ဆက်ရပါတော့သည်။
"ကျွန်တော် အောင်မျိုးသူလွင် ပါဆရာမ"
"သိတယ် တို့ မင်းရေးတာတွေ အကုန် သဘောကျတယ်၊ တစ်ပုဒ်မှတော့ မဖတ်ဖူးဘူး"
"ခင်ညာ တစ်ပုဒ်မှ မဖတ်ဖူးဘဲ ဆရာမက ကျွန်တော့်စာတွေ ဘယ်လို သဘောကျလဲဟင်"
"ဒီလိုလေ တို့က လူတစ်ယောက်ကို သူ့စာတွေ မဖတ်ဖူးခင်ဆို သဘောကျပြီးသားပဲ၊ အဲ သူရေးတာတွေ ဖတ်ပြီးလို့ သောက်ညင်ကပ်လာရင်တော့ ပြင်မရတတ်ဘူးရယ်။ အဲဒါကြောင့် မင်းကိုသနားလို့ မင့်စာတွေဆို ကျော်ဖတ်တယ်"
ကျွန်တော်လည်း သူပြောမှ မိမိကိုယ်ကို အင်မတိ အင်မတန် သနားသွားရင်းက ဝမ်နည်းသလိုလိုလည်း ဖြစ်လာကာ မိမိစိတ်ကို မနည်းကြီး ငြိမ်အောင်ထိန်းရင်း အချင်းချင်း အဆင်ပြေစေရန် မြှောက်ထိုးပင့်ကော် ပဋိသန္တာရ စကားကို ဆက်ရပါတော့သည်။
"ဆရာမဟာ ငယ်ငယ်ရွယ်ရွယ်နဲ့ အင်အားရှိတဲ့ စာတွေ အများကြီးရေးနိုင်တာပဲနော်၊ ကျွန်တော့်အထင် ဆရာမဟာ ဘယ်နည်းနဲ့မှ လေးဆယ်ကျော်ဦးမယ် မဟုတ်ဘူး၊ အလွန်ဆုံး ကျွန်တော့်ထက်ကြီးလှ လေးငါး ခုနစ်နှစ်ပဲ"
ဆရာမကြည်နုခေတ်၏ မျက်နှာသည် ရုတ်ချည်း သုံးရက်ခန့် မရောင်းရသော ဘူးသီးနုနုကို နေပူမိထားသလို ညိုမဲရှုံ့တွ သွားရင်းက "ကျမအသက်က အခုမှ နှစ်ဆယ့်လေး ရှိသေးတယ် ဂေါပက ရဲ့" ဟု အငေါ်ပြန်တူးပါတော့သည်။
ကျွန်တော်က သူ့ နဂိုရှိရင်းအသက်ဟု ကျွန်တော်တကယ်ထင်နေသည်ထက် ထက်ဝက်မျှ လျော့ပြီး ပြောလိုက်ခြင်းဖြစ်ပါသည်။ ယခုမူ မျက်နှာမရပဲ ခြေကျောက်ရမလို အဖြစ်မျုိး။ သို့သော် ဆရာမက အင်မတန် သဘောကောင်းသူဖြစ်၍ သည်းညည်းလည်း ခံနိုင်ရှာပါပေသည်။
"ဒမယ် ခင်ဗျား နာမည်က ရှည်လွန်းတယ်၊ အဲသည်တော့ ကိုအောင်ညိုးပဲ ခေါ်မယ်၊ အဲဒါ ကြိုက်ချင်ကြိုက် မကြိုက်ချင်နေ"
"ဟုတ်ကဲ့ သဘောရှိသလိုခေါ်ပါ ဆရာမ။ ကိုအောင်မျိုး ဆိုတာမှ ရှည်နေသေးရင်လည်း နောက်က အောင်မျိုးဆိုတာပါ ဖြုတ်ပစ်လိုက်ပြီး ရှေ့ဆုံးတစ်လုံးတည်းပဲ ခေါ်ပါ၊ ကျွန်တော် စိတ်မဆိုးပါဘူး"
"အောင်မယ် သည်အဆင်နဲ့ သည်အဆင် အဲလို ခေါ်စရာလား၊ အခုပဲ အပြင်ထွက်ကြည့်ပါဦး၊ ဘေးလူမြင်ရင် ဖအေကြီးကပဲ သမီးကိုဘုရားလိုက်ပို့ သလိုလို ထင်ကြမှာ မြင်သေး"
ဤ၌ စောစောက ကျွန်တော်သည် ကျွန်တော့်နာမည်ကို ဆရာမကြည်နုခေတ်က အောင်ညိုးဟု ခေါ်သည်ဟု ရေးသားခဲ့ရာ ဆရာမနှင့် မသိ မခင်ဖူးသူများက ဆရာမကို စကားမပီလေသလော၊ သို့မဟုတ် လျှာခင်ပင်တွဲလေသလောဟု သံသယ ဖြစ်ကြမည်ကို စိုးမိပါသည်။ ဆရာမ လျှာခင် တွဲမတွဲကိုမူ ကျွန်တော်မှာ လေ့လာရန် အခွင့်မရှိ၍ သေချာစွာမသိသော်လည်း ဆရာမမှာ စကားပီသူ ဖြစ်သည်ကိုမူ ကျွန်တော် အာမခံပါသည်။ သို့သော် သူကျွန်တော့်ကို တလျောက်လုံး ကိုအောင်ညိုးဟု သာခေါ်ပါသည်။ ထိုသို့ခေါ်တိုင်းလည်း ကျွန်တော်မှာ စိတ်ယားလှပါသည်။
"ခင်ဗျား ကြည့်ရတာလည်း ကွမ်းတဗျစ်ဗျစ်နဲ့"
"ဟုတ်ကဲ့ ဆရာမ မကြိုက်ရင် ကျွန်တော် မဝါးတော့ပါဘူး"
"အို ဝါးပါ၊ ဝါးပါ။ ကျနော်က 'မင်းပြောတာကို ငါလက်မခံဘူး၊ သို့သော် မင်းဒီစကားကို ပြောခွင့်ရဖို့တော့ အသက် ပေးပြီး ဆောင်ရွက်ပေးသွားမယ်' ဆိုတဲ့ လူမျိုးပါ"
"ဒါဆို ဆရာမက ကွမ်းဝါးတာကို မကန့်ကွက်ပေမယ့် ကြိုက်တော့ မကြိုက်ဘူးပေါ့နော်"
"မန်းလေးသားလို့ မပြောရဘူး လျှာကလည်း ရှည်တာ၊ ပေးစမ်းပါ တစ်ယာလောက်" ဟုဆိုကာ ဇိုးခနဲ့ ဇတ်ခနဲ့ ကျွန်တော့် ကွမ်းထုပ်ကို ယူကာ သွားဖြဲနားဖြဲ ဝါးပါလေတော့သည်။
ထို့နောက် ကျွန်တော်လည်း သူသွားချင်သော မန်းတောင်ပေါ်သို့ လိုက်ပို့ရန် ဆိုင်ကယ်ကို မောင်းထွက်ခဲ့ပါတော့သည်။ ဆရာမသည် ရန်ကုန်သူ ပီပီ ယဉ်စည်းကမ်း လမ်းစည်းကမ်းကို အင်မတန်လိုက်နာသူ ဖြစ်သည့်အားလျော်စွာ ဆိုင်ကယ်ဦးထုပ်ကို အကျအန ဆောင်း၊ ဦးထုပ်လေကာမှန်ကို အကျအန ချပြီး ခန့်ခန့်ကြီးစီးလာလေရာ မသိသူ အချို့က ပထမဆုံး အမျိုးသမီး အာကာသ ယဉ်မှူး ဗလန်တီနာ(Valentina Tereshkova) လိုလို ထင်မှတ်မှားကြမည်လား မပြောတတ်ပါပေ။
ကျွန်တော်ကတော့ ဦးထုပ်ကိုမဆောင်း၊ လက်ကိုင်မှာချိတ်ပြီး စကားလေး တပြောပြော ကွမ်းလေး တမြုံ့မြုံ့ လမ်းဘေးကို ကွမ်းသွေး တစ်ဗျစ်ဗျစ်ထွေးရင်း ချစ်ဖွယ်သော မန်းသားများ၏ အမူအယာကို ပေါ်လွင်စေလျှက်က ဆိုင်ကယ်မောင်းလာပါသည်။
"ဖွီး"
"အောင်မလေးဗျ၊ စပ်တယ်၊ စပ်တယ်။ သေပါပြီ"
ဆရာမ ကြည်နုခေတ်၏ ကျယ်လောင်စူးရှ အောင်မြင်လှသော အသံများဖြစ်ပါပေသတည်း။ ကျွန်တော်ဆိုင်ကယ် ရပ်ပြီး နောက်ပြန်လှည့်ကြည့်လိုက်သောအခါ ဆိုင်ကယ်ဦးထုပ် လေကာမှန်ကို မလျှက် မျက်နှာတစ်ခုလုံး နီရဲပြီး မျက်လုံးကိုစုံမှိတ်ကာ လက်နှင့် ပွတ်ပြီး အော်နေသော ဆရာမ၏ မျက်နှာကို ကွမ်းသွေးတို့ဖြင့် ရဲဗလောင်းခတ်လျှက် မြင်ရပါတော့သည်။
ဆရာမသည် ရှေ့မှ ကျွန်တော် ကွမ်းတဗျစ်ဗျစ်နှင့် လုပ်နေသည်ကို အားကျ၍လောမသိ၊ လမ်းဘေးဘက်သို့ လှည့်ပြီး သူ၏ မဟာခံတွင်းတော်မှ မြောက်မြားလှစွာသော ဝါးဖတ်တော် ကွမ်းများနှင့်တစ်ကွ တြာတြာရဲသော ကွမ်သွေးများကို ထွေးထုတ်တော် မူလိုက်ရာ သတိမေ့ပြီး ဆိုင်ကယ်ဦးထုပ်လေကာမှန်ကို မဖယ် လိုက်မိသောကြောင့် မျက်နှာတစ်ခုလုံး ရှက်သွေးမဟုတ်သော ကွမ်းသွေးများပေတူးလန်ကာ၊ မျက်လုံးထဲသို့ပါ ဝင်ကုန်ပြီး ဝရုန်းသုံးကား ဝူးဝူးဝါးဝါး ဖြစ်ကုန်ရပါတော့သည်။
"ကိုအောင်ညိုး ရေပေးပါ၊ ရေ ရေ၊ စပ်တယ်ဗျ"
"ဪ ဟုတ်ကဲ့ပါ ဆရာမ ရော့ ရော့၊ သောက်လိုက်ပါ၊ စောစောက ကျွန်တော်သောက်ထားတာ ဖင်ကပ်ပဲ ကျန်တော့တယ်ရယ်၊ မရွံတတ်ဘူးမို့လား။ သောက်သာသောက်"
"နင့်မေကလွား၊ စပ်တာက မျက်စိဟ၊ မျက်နှာသစ်ရမှာ၊ အဲသလောက်လေးနဲ့ ရမလား ငတုံးရဲ့"
"ဟုတ်ကဲ့ပါ ဆရာမ၊ ကျွန်တော် အနီးဆုံး ဆိုင်တစ်ခုကို ရောက်အောင် မောင်းနေပါတယ်"
"အား မူးဒယ်၊ မူးဒယ် အန်လည်း အန်ချင်တယ်၊ ဝု ၊ အာဝု"
"ဟင် ဆရာမ၊ အနော် ဘာမှလုပ်ဘူးနော်၊ အဲဒါ ဆရာမဘာသာ သွေးရိုးသားရိုး မူးတာ"
"နင်ကျွေးတဲ့ ကွမ်းတွေ စားပြီး အခုငါမူးတာလေ၊ အောင်မလေးသေပါပြီ၊ လောကကြီးလည်း ချာချာလည်ပြီး၊ ချွေးတွေလည်း ပြန်နေပါပြီ"
ထိုနေ့က မျက်လုံးကို စုံမှိတ်ပြီး ဒေါသတွေ အလိမ့်လိမ့်ထွက်ကာ အော်နေသော ပုံမကျပန်းမကျ အမျိုးသမီးတစ်ယောက်ကို တင်ပြီး မီးနီတွေပင် မရပ်ဘဲ ဆိုင်ကယ်ကို ဇွတ်မောင်းမောင်းသွားသော တောသားတရုတ်လို ပုံတုံးတုံး လူတစ်ယောက်ကို အရေးယူချင်ကြသော အကြင် မော်တော်ပီကယ် အပေါင်းသည် ဤစာကိုဖတ်မိပါက ဆရာမ ကြည်နုခေတ်ထံ ဒဏ်ကြေး တောင်းယူနိုင်ကြပါကြောင်း အသိပေးရပါသည် ခင်ဗျာ။
ဆိုင်ရောက်၍ ကိုယ်လက်မျက်နှာ သန့်စင်ခြင်းအမှုကို ပြုပြီးသည်နှင့် တပြိုင်နက် ဆရာမသည် ကျွန်တော့်အား ဆိုင်ကယ်ကို ဗရမ်းဘတာ မောင်းသည်ဟူသော ဆွဲချက်ဖြင့် ရစ်ပါတော့သည်။ သူသည် ရန်ကုန်မြို့တစ်ခွင် လှိုင်သာယာ မယ်နု ဟူသော နာမည်ဖြင့် အမွှေစိန် ဘွဲ့ကို ရရှိထားသူ ဖြစ်ရကား ကျွန်တော့်လို တောသားငပါမွှားမှာ သူရစ်သမျှ ရစ်မှန်းမသိ ခံရပါတော့ သည်။
"ဒမာ ခင်ဗျားအခုလိုမောင်းပုံ မျိုးနဲ့ကတော့ မြန်မြန် မသာပေါ်မှာ ပဲ"
"ဟိုဟာလေ ဆရာမပဲ မျက်စိစပ်တယ် မြန်မြန်မောင်းဆို"
"တော်တိတ်၊ အသက်ကို ဉာဏ်စောင့်သတဲ့ မှတ်ထား၊ ယာဉ်မောင်းတယ်ဆို လွယ်မှတ်နေလား"
"ကျွန်တော်ဘာများ လုပ်မိလို့ ပါလည်း ဆရာမရယ်"
"အောင်မလေး လူကြည့်တော့ ဘိုးမင်းခေါင်လိုလို၊ ဘိုးဘိုးအောင်လိုလို၊ အခုမှ အလှဖန်တီးရှင် အသံမျိုးနဲ့ ချွဲမနေစမ်းနဲ့၊ နားကြားပင်းကပ်တယ်။ အခု ခင်ဗျား အရက်သောက်ထားသလား ပြော"
"ဘုရားပေးပေး ကျမ်းပေးပေးပါဆရာမရယ်၊ အစောကြီးရှိသေးတာ မသောက်ရပါဘူး"
"ဘာမှ မပေးဘူး မသောက်ရသေးရင် အခုသောက်"
"ခင်ညာ"
"ခင်ညာ မလုပ်နဲ့ အခုသောက်ဆို သောက်၊ မသောက်ရင် ခင်ဗျားနောက်က မလိုက်ဘူး၊ အန္တရာယ်များတယ်"
"ဟိုလေ မူးရင်မမောင်းနဲ့၊ မောင်းရင် မမူးနဲ့ ဆိုတယ်မို့လား ဆရာမ"
"အောင်မယ် သူကများ ဘုန်းကြီးရှေ့က မသာထွက်ချင်နေသေးတယ် ဒီက ပြောသလိုသာလုပ်"
"ဟိုလေ ဆရာမ၊ နွားရှေ့ထွန်ကျူး တယ်လည်း မထင်ပါနဲ့ ကျွန်တော်က ဘာလို့သောက်ရမှာလဲ ဟင်"
"အန္တရာယ် ကင်းအောင်လို့ လေ"
"ဘယ်လို ဘယ်လို"
"အိတ်စကျုမီ၊ ပလိ၊ အိတ်စပလိန်း မီ ဆရာမ" ( နားမလည်၍ ရှင်းပြခိုင်းသည်ကို ဘိလပ်လို မအူတတ် အူတတ် အူထား ခြင်းဖြစ်ပါသည်။ ဤကား စကားချပ်။)
"ထွီ တံတွေး ကလည်းစင်တာ၊ ဒမယ်ငတုံးရဲ့"
"ဟုတ်"
"ဒီနေ့ အထိ ယာဉ်တိုက်မှု စာရင်းဇယား ထုတ်ပြန်ချက်တွေ အရ ယာဉ်တိုက်မှု တွေရဲ့ ၁၀% ဟာ မူးပြီးမောင်းလို့ ဖြစ်တာတွေပဲတဲ့"
"ဒါဖြင့် ဆရာမက အခုကျွန်တော့်ကို သောက်ပြီး မောင်းခိုင်းနေတော့ကာ ငယ်ငယ်ရွယ်ရွယ်နဲ့ လူပြည်ကို စိတ်ကုန်နေပြီလားဟင်"
"တုံးတယ်ပြောရင်လည်း မျက်နှာပျက်သေးတယ်၊ ခင်ဗျားလို သုံးဆယ်ကျော်လို့မှ လူပျိုရည်မပျက်သေးတဲ့ သူကတောင် စိတ်မကုန်တာ ကျုပ်လို လူတကာ မငြင်းတဲ့ စူပါကွင်းက စိတ်ကုန်စရာလား"
"ဒါဖြင့် အကြွေးပူနေလို့ ကိုယ့်ကိုယ်ကို သေကြောင်းကြံမလို့လား"
"ဟဲ့ ဒမာ၊ ခင်ဗျားကြီး လော့ဂျစ် မသင်ဖူးဘူးလား"
"ဟုတ်ကဲ့ ဆရာမ ပညာမကြွယ်လို့ အားငယ်မိပါတယ်"
"အိမ်း ဒလိုလေ ဒလို၊ ခင်ဗျားကို အရက်သောက်ပြီး မောင်းခိုင်းတယ်ဆိုတာက"
"ဟုတ်"
"စောစောက ပြောတာလို ယာဉ်တိုက်မှု အားလုံးရဲ့ ၁၀% ဟာ မူးပြီးမောင်းလို့ ဆိုတော့ကာ လောဂျစ်ကယ် နည်းအရ စဉ်းစားတဲ့အခါ ကျန်တဲ့ ၉၀%ဟာ မမူးဘဲမောင်းလို့ ဖြစ်တာပဲ ဗျ။ ဟုတ်ဘူးလား။ ဒီတော့ အန္တရာယ် ကင်းအောင် မောင်းခါနီးတိုင်း သောက်ပါလေ"
ဤသို့ အင်မတန်မှတ်သား ဖွယ်ကောင်းသော ဆရာမ ကြည်နုခေတ်၏ လော့ဂျစ်ကယ် နည်းလေးကို ဖောက်သည်ချပြီးသည်၏ အခြားမဲ့၌ ကျွန်တော်မှာ ယခုရေးသားနေသော ကြည်နုခေတ်နှင့် တွေ့ဆုံခြင်း ဟူသည့် ဆရာမ ကြည်နုခေတ်၏ အတ္တုပ္ပတ္တိ တစ်စိတ်တစ်ပိုင်းရေးသား ခြင်းကို နိဂုံး ကမ္ပတ် အဆုံးသတ်ရပါသည်။ အကယ်၍ ကျွန်တော်က ယခုစာကို ဤ တွင် အဆုံမသတ်သော် ဆရာမ ကြည်နုခေတ်က ကျွန်တော့်အား အဆုံးသတ်ရန် မန္တလေးကို တစ်ခေါက် ပြန်တက်လာမည်ဟု ခြိမ်းခြောက်လာပါသောကြောင့် ကျွန်တော်မှာ လှိုင်သာယာ မယ်နု၏ အာဏာစက်ကို ကြောက်ကြောက်ဖြင့် မသတ်ချင့်သတ်ချင် အင်တင်တင်ဖြင့် ဤစာအား ဤနေရာတွေ နိဋ္ဌိတံစေရပါတော့သည်။
ကြည်နုခေတ် တစ်ယောက် စိတ်အေးချမ်းသာ ရှိပါစေသော်ဝ်။ ။
အောင်မျိုးသူလွင်
၁၉/၀၈/၂၀၁၄
အင်္ဂါ
နေ့ ၀၁:၃၅
