အသည်းကွဲတယ်ဆိုတဲ့ နာမလေးတောင် တပ်ခွင့်မရဘဲ ခံစားချက်ကို မျိုသိပ်နေရတဲ့ မိန်းမတစ်ယောက်ဆီက မောင်ဘာများ ထပ်လိုချင်သေးတာလဲမောင်။
သည်လိုပြောတော့ မောင်က စိတ်ဆိုးဦးမယ်။ ကျမ မောင့်လို စာလှအောင် မရေးတတ်ဘူးမောင်ရဲ့။ ကျမရေးတဲ့ စာကို ခံစားပေးမယ့် ပရိတ်သတ်လည်း မရှိပါဘူး။ ယုတ်စွ အဆုံး မောင်ကိုယ်တိုင်ကတောင် ကျမ ခံစားချက်တွေကို ပြက်ရယ်ပြု၊ မသိချင်ဟန်ဆောင် သလိုနဲ့ ဘယ်နှခါများ ကျမသည်အကြောင်းပြောရင် သေချာနားထောင်ဖူးလို့လဲကွယ်။
ကျမက မောင့်စာတွေဖတ်ရင်း မောင့်ဘဝထဲကို သွားချင်မိတဲ့ နေရာလွဲ ပစ္စည်းတစ်ခုလေလား။ ကျမဘက်မှာ ကျမရပ်နေတုန်းကတော့ ကျမလည်း ကျမတန်ဖိုးနဲ့ ကျမ နိမ့်ကျသူတစ်ယောက် မဟုတ်တာ မောင်လည်းအသိပါ။ ကျမမှာ လူရိုသေ၊ ရှင်လေးစား ဘဝတစ်ခုရှိတယ်မောင်။ ကျမမှာ ကျမကို လေးစားသမှုထားတဲ့ ပတ်ဝန်းကျင်တစ်ခု ရှိတယ်မောင်။ ကျမကို သိပ်ချစ်တဲ့ မိဘမောင်ဘွားတွေကိုတောင် ကျောခိုင်းပြီး မောင့်ဘဝထဲကို လာချင်မိတဲ့ အပြစ်တောင်မည်လား မသိတဲ့ အချစ်အတ္တလေး တစ်ခုနဲ့တင် အခု ကျမကိုယ် ကျမ အမှိုက်တစ်စလို ခံစားရအောင် မောင်ကလုပ်ရက်တယ်။
ကျမက မိန်းမသားပါမောင်။ ပတ္တမြားရတု ကျော်ကျော် သည်အသက်နဲ့ကျကာမှ ကလေးတွေလို အသည်းကွဲပြရမှာလား။
မောင်က ကျမကို ချစ်တယ်လို့တောင် မပြောဖူးဘူးနော်။ တကယ်တော့ ကျမမှာ အသည်းကွဲတယ် လို့တောင် အမည်တပ်ခွင့်မရှိလောက်အောင် မောင့်ဘက်က စေ့စပ်သေချာလွန်းတယ် ဆိုရလေမလား။
မဟုတ်ဘူးမောင်။ ကျမ မောင့်ကို အဲသည်လိုလည်း အပြစ် မတင်ရက်ပါဘူး။ မောင်က ကျမကို မချစ်ပေမယ့် ကျမက မောင့်ကို့ အဲသလောက်ထိ ရူးတာခဲ့တာပါ မောင်ရယ်။
မောင်ရေ မောင့်ဘက်က ပိုင်ဆိုင်လိုစိတ်မရှိတဲ့ အခါ၊ ကျမဘက်က စွန့်စားမယ်ဆိုတာကြီးက သဲထဲရေသွန် ဖြစ်ပါရောလား။ ကျမကို မောင်ကမဆောင်ကြဉ်းနိုင်ရင် ကျမက
မောင့်ကိုဆောင်ကြဉ်းမယ်လို့ စိတ်ပိုင်းဖြတ်ကာ ချစ်ခဲ့ပြီးပါမှ အခုမောင်က နေမြဲဆိုတော့ ချစ်ပြီးသားနှလုံးသားက သူ့ အင်နားရှားကို သူမနိုင်ဘူးမောင်ရဲ့။
ရှေ့ကသွားစရာလည်း မလိုပါဘူး၊ နောက်ကလိုက်ပါလို့လည်း မောင့်သိက္ခာကို အကျခံပြီး ကျမ မဆိုရက်သလို ကျမနားမှာပဲ နေပါမောင်ရယ်လို့ ပြောပြီး ဖြစ်သမျှလောကဓံ ကို မောင့်ရင်ငွေ့လှုံပြီး ကျမတစ်ယောက်တည်း ရှင်းရဲလောက်အောင်ထိ ကျမဘက်က သတ္တိရှိခဲ့ပါတယ်။
အခုတော့ မောင့်ဘက်ကစပြီး အသည်းကွဲနေသလိုလို ကြေငြာတော့ မောင်နဲ့ပေါင်းရဖို့ အရာရာကို ရင်ဆိုင်မယ်လို့ မြနေအောင်သွေးထားတဲ့ ကျမစိတ်ဓါတ် ဓားသွားက မပဲ့ရပါဘဲ၊ ဘာမဆို တုံဏိဘာဝေ ဆိတ်ဆိတ်နေနိုင်လွန်းတဲ့ မောင့်ရဲ့ အချစ်အာမခံ နှလုံးသားကြီးက အနှောင့်ပိုင်းက နာပြနေသလိုပဲမောင်။ ဒါပေမယ့် အခုထိ ကျမ ညံ့နေသေးတာက ကိုယ့်ဘက်က အမှန်တကယ် ခံစားနေရသမျှကို ပိုပိုသာသာ မပြောနဲ့ တိတိပပတောင် တစ်ပါးသူနားဝင်အောင် မပြဆိုတတ်သေးတာပါပဲ မောင်ရယ်။
မောင်က ထားခဲ့မယ် ပြောတဲ့အခါ ကျမက အလွမ်းဆိုတာကို တယုတယ ကောက်ပြီး အမှတ်တရ သိမ်းထားမှာပေါ့မောင်။ မောင်က သွားတော့လို့ ပြောတဲ့အခါ ကျမက အစွန့်ပစ်ခံ နှလုံးသားကို လူမမြင်အောင်သိုဝှက်ရင်း သတိရတိုင်း ထုတ်ကြည့်၊ အရသာရှိရှိ ငိုမှာပေါ့မောင်။ အခုတော့ ကျမကပဲ မောင့်ကို ထားခဲ့လေသယောင်၊ ကျမကောင်းစားဖို့ပဲ မောင်က
ကျမကို စွန့်လိုက်လေသယောင် မောင့်ဘက်က ကြေငြာတော့ ကျမဘက်က ဗီလိန်ဆိုတဲ့ ဘဝကိုပဲ အမှတ်တရ သိမ်းရတော့မလား မောင်ရယ်။
ပိုက်ဆံတွေ ကျမဘာလုပ်ရမလဲ၊ ကျမနဲ့ယူလို့ တူနှစ်ကိုယ် တဲအိုပျက်လည်း မောင်နေရမှာ မဟုတ်သလို ကျမကိုယ်တိုင်လည်း ထမင်းရည် လျက်စရာမလိုလောက်အောင် ကျမတို့မှာ သင့်တင့်တဲ့ အခြေအနေတွေ ရှိပြီးသားပါမောင်။ ကျမတို့ အသက်က ဆယ့်ခြောက်နှစ်မဟုတ်သလို မောင့်ကို ချစ်တာလည်း လေတိုက်လို့ သစ်ရွက်အကြွေမှာ ပြုံးမိရင်း ဖြစ်လာတာမျိုးထက် အများကြီး လက်တွေ့ဆန်ခဲ့ပါတယ်။ ကျမက ကတ္တီပါ ဖိနပ်စီး ရွှေထီးဆောင်းရတယ် ဆိုတာမျိုးထက် မောင့်လက်မောင်းပေါ်ခေါင်းအုံး အိပ်ရတဲ့ ဘဝကိုပဲ ပိုလို့ စိတ်ကူးယဉ်မိသူပါမောင်။
မောင့်ကို သတ္တိမရှိဘူးလို့ ကျမ မစွပ်စွဲရက်သလို၊ ကျမကို မိုက်ရူးရဲ ဆန်တယ်လို့ လည်းမောင်က မသမုတ်ပါနဲ့။ ပေါင်းရဖို့ မရှိတဲ့နောက် အချစ်ဆိုတာ ကြိုးပြတ်သွားတဲ့ လေတံခွန်လိုပဲ မောင်ရဲ့။ အခုကျမစိတ်တွေ ဦးတည်ရာမဲ့ နေရပြီလေ။ ကျမတို့နှစ်ယောက်ကြားမှာရှိတဲ့ အချစ်ဆိုတဲ့ ကြိုးလေးကို မောင်ဘာလို့ တင်းတင်းကိုင်မထားနိုင်တာလဲ ဟင်။
ပြောရက်လိုက်တာ မောင်ရယ်။ အချစ်ဆိုတာ ခန္ဓာဗေဒအရ လိုအပ်ချက်တစ်ခုတဲ့လား။
ကျမက စာရေးဆရာ မဟုတ်ပါဘူးမောင်။ ဒါပေမယ့် မောင့်ကို မေးချင်ပါရဲ့။ ရင်ထဲက နှလုံးသားကြီးကို ကျမ လွှင့်ပစ်လိုက်ရတော့မလား မောင်။ အချစ်ဆိုတာ ဘဏ်မှာငွေလွှဲသလို သည်ဘက်မှာ အသွင်းပြတိုင်း ဟိုဘက်မှာ တန်ဖိုးတူတာမထွက်ဘူး မောင်ရဲ့။ ကျမက မောင့်ကို ချစ်သလို အခြားတစ်ယောက်ကို သည်အတိုင်းချစ်နိုင်လိမ့်မယ်လို့ မောင်ဘာကြောင့် တွေးရက်နိုင်အားတာလဲ။ မောင်ရေ ဘာသာမဲ့ လို့သာ ကျမ ကြားဖူးပါရဲ့၊ အချစ်မဲ့တဲ့လူဆိုတဲ့ ဝေါဟာရ အသစ်ကို ကျမ နားယဉ်သွားအောင် မောင်က ရိုက်သွင်းနေလေသလား။ မောင့်နှလုံးသား ဘာသာဗေဒမှာ အချစ်ဆိုတာ ရုပ်သဘောပဲ ကြီးစိုးနေလေသလား မောင်ရယ်။
အခုတော့ မောင်က ကျမချစ်ဖူးတဲ့ မောင်နဲ့ မတူတော့သလိုပဲ။ ညညကျမ စိတ်ညစ်ညစ်ရှိတိုင်း ဖုန်းလေးနဲ့ ချော့သိပ်တတ်တဲ့ မောင်က အခုဆို ဖုန်းဆက်တိုင်း ကျမတစ်ခုခုကို တောင်းဆိုလိုက်မှာ ကြောက်နေသလို အငွေ့အသက်တွေ ပြနေတော့ ကျမ မခံစားနိုင်ဘူးမောင်။ အရင်လို တိုင်းရေးပြည်ရေး နိုင်ငံ့အရေးတွေ ဆွေးနွေးတဲ့အခါတိုင်း ပြတ်သားတဲ့ မောင့်အတွေးအခေါ် ဆုံးဖြတ်ချက်တွေကို အထင်တကြီး အားကျမိတဲ့ ကျမ၊ အချစ်နဲ့ကျကာမှ ဦးနှောက်လောက် မပြတ်သားနိုင်တဲ့ မောင့်နှလုံးသားက ကျမနဲ့ ပတ်သက်ပြီး သံယောဇဉ် တစ်မျဉ်လေးတောင် မတင်းတာ အံ့လည်း ဩပါရဲ့မောင်ရယ်။
မောင်က ကျမ နှလုံးသားကို နိုးထစေခဲ့သူပါ။ ကျမ မောင့်လောက် ဘယ်တစ်ယောက်ကို မှ ချစ်နိုင်တော့မှာ မဟုတ်ဘူးမောင်။ မောင့်ကို အပိုင်ရသည် ဖြစ်စေ၊ မရသည်ဖြစ်စေ အဲဒါ ကျမ ကံလို့ပဲ မှတ်ပါတယ်။ ဒါပေမယ့်မောင်ရယ်၊ အချစ်လား၊ အလွမ်းလား၊ စွန့်ပစ်ခံရခြင်းလား တစ်ခုခုပေါ့မောင်ရယ်၊ နောက်ဆုံးအနေနဲ့ပဲ ဖြစ်ဖြစ် ကျမကို စစ်မှန်တာတစ်ခုခုပဲ ပေးပါ။ ကျမ ဘဝ တစ်လျှောက် မြတ်မြတ်နိုးနိုး သိမ်းယူသွားချင်လို့ပါ။
ကျမသေဆုံးတဲ့ အခါ နှလုံးသားကို ခွဲကြည့်ရင် ကျောက်ဖြစ်ရုပ်ကြွင်းလို ပုံမပျက်ရှိနေမယ့် အဲသည်တစ်ခုခုကို ကျမ စစ်မှန်တာလေး ဖြစ်စေချင်ပါတယ်။
ကျေးဇူးပြုပြီး သူတကာ အထင်လွဲအောင် အသည်းကွဲ ကြေငြာစာတမ်းတွေလည်း မထုတ်ပါနဲ့တော့။ ကျမကို လည်း ဗီလိန်မလုပ်ပါနဲ့တော့။ မောင်ကျေနပ်မယ်ဆို ကျမနှလုံးသားကို နင်းသွားလိုက်ပါမောင်။ သို့သော် စစ်မှန်တဲ့ နင်းခြေ ခြင်းမျိုးတော့ ဖြစ်ပါစေပေါ့။ ကျမက မောင်ကလွဲရင် ဘာမျှ မလိုချင်သူမို့ ကျမကောင်းစားဖို့ဆိုတဲ့ အကြောင်းပြချက်မျိုးနဲ့တော့ အသည်းကွဲ မပြပါတော့နဲ့လား မောင်ရယ်။ နောက်ဆုံးအနေနဲ့ မောင်ပေးတဲ့ စစ်မှန်ခြင်းတစ်ခု ကျမ သိမ်းထားချင်လို့ပါ။
မောင်က လိုချင်တယ်ဆို ကျမ အားလုံးပေးခဲ့တာပဲမောင်။ မောင်က ငြိုညင်တယ်ဆို ပြောလက်စ စကားကိုတောင် ရပ်ပြီး ကျမ တိတ်ဆိတ်ပြခဲ့တာပဲ။ နှစ်ကိုယ်မကြင်ရတဲ့ ဘဝမှာ မောင့်ဆီက လိုချင်မိတဲ့ တစ်ခုခုဟာ အချစ်ဖြစ်ရမယ်လို့ ကျမ မဆိုပါဘူး။
အခုခေတ်မှာ အစစ်ဆိုတာရှားတယ် မောင်ရဲ့။ အချစ် စစ်စစ်။ အမုန်း စစ်စစ်။ အလွမ်း စစ်စစ်။ စွန့်ပစ်ခံရခြင်း စစ်စစ်။ တစ်ခုခုပေါ့မောင်ရယ်။ ကျမ လက်ခံနိုင်လောက်မယ့် တစ်ခုခုနဲ့ ကျမနှလုံးသားကို ဘဝတစ်သက်စာ မြှုပ်နှံ ပစ်လိုက်ချင်လို့ပါ။ (Look မဂ္ဂဇင်း)
အောင်မျိုးသူလွင်
၀၃/၀၉/၂၀၁၄
ဗုဒ္ဓဟူး
နေ့လည် ၀၂:၃၆
