တစ်ခုသော ကျောင်းဆင်းချိန် ညနေခင်းတွင် မောင်နီသည် သူ့လမ်းကို ပိတ်ရပ်နေရပါမည်လားဟု မောင်ဖြူလေးကို သက်သက် အပြစ်ရှာ ထိုးကြိတ်လွှတ်လိုက်သည်။ အားမတန်သော မောင်ဖြူလေး ငိုပြီး သူ့အစ်ကို မဲကြီးအား သွားတိုင်ရာ၊ မဲကြီးသည် တော်တော်စိတ်ဆိုးသော ဟူ၏။
သူ့ညီကို သက်သက်ရန်ရှာထိုးကြိတ်လိုက်သော မောင်နီကို ၄င်းတို့ရပ်ကွက်ထဲအထိ လိုက်ရှာရာ၊ တစ်ခုသော ခြံစည်းရိုးမဲ့ အိမ်နောက်ဖေးတွင် ဝက်စာသယ်နေသော မောင်နီကို ပက်ပင်းတွေ့လေသည်။ မောင်နီသည် မဲကြီးကို သေချာမသိရှာလေ။ သို့မဟုတ် သူ့အနားရောက်လာသူ ဘယ်သူဟုပင် ဂရုမစိုက်နိုင်အားပေ။
စောစောက လမ်းထိပ်ကွမ်းယာဆိုင်မှာ မောင်နီ့အကြောင်း စုံစမ်းစဉ် မောင်နီသည် ကျူးကျော်ကွက်သစ်မှာနေကြောင်း၊ ဖတဆိုးလေးဖြစ်ကြောင်းနှင့် သူ့အမေ၏ လက်ရှိယောက်ျားမှာ အရက်သမားဖြစ်ကာ သူတို့မိသားစုကို အင်မတန် နှိပ်စက်ကြောင်းတွေပါ မဲကြီး ကြားခဲ့ရသည်။ သူတို့ မိသားစုဟာ အင်မတန် စရိုက်ဆိုးသတဲ့။ ထစ်ခနဲ့ရှိ လင်မယားရန်ဖြစ်လျင် ကြားက မြေစာပင် မောင်နီလည်း မဆီမဆိုင် အရိုက်ခံရတတ်သတဲ့။
မဲကြီးသည် ကွမ်းယာသည်ပြောသော စကားကို ဆုံးအောင်မှ နားမထောင်တော့ဘဲ မောင်နီ့အိမ်ရှိရာဘက် သွက်သွက် လာခဲ့စဉ်၊ လမ်းခုလတ်မှာ မောင်နီ့ကို ပက်ပင်းတွေ့ခြင်း ဖြစ်သည်။
မနိုင့်တနိုင် ဝက်စာပုံးကို သယ်မလျက်၊ ညစ်ထေးထေး မျက်နှာကို အောက်ချလျက် နုံးဖျော့ဖျော့ အကြည့်ဝေဝေနှင့် ကောင်လေးမှာ ညနေ ကျောင်းဆင်းချိန်က သူ့ညီကို အကြောင်းမဲ့ ရန်ရှာထိုးကြိတ်သွားသော စောင့်ကြွားကြွား မောင်နီဟုပင် ထင်ရက်စရာမရှိပေ။
မဲကြီး မောင်နီ့အနားသို့ တိုးသွားလိုက်သည်။
"စောစောက ကျောင်းဆင်းချိန်မှာ ဟိုဘက်ရပ်ကွက်က မောင်ဖြူကို ထိုးသွားတာ မင်းလား" ဟု မေးလိုက်သည်။
*****
"ကိုအောင်မျိုး သလိပ်ခွက်က ဒီဘက်ကစင်ပေါ်မှာ၊ စာရွက်ကို စားပွဲပေါ်တင်ခဲ့မယ်နော်၊ နေ့ခင်းလောက် အဖြေလိုချင်တာ ရနိုင်မလား"
နှစ်ထားသော အာရုံကို ဖြတ်ပြီး ဝင်လာသော ရင်းနှီးနေကျ စကားသံကြောင့် ဖတ်လက်စ စာအုပ်ကို ချပြီး ကျွန်တော်လှည့်ကြည့်လိုက်စဉ် ဆရာမ မဝင်းဝင်းမေ ကိုတွေ့ပါသည်။ သူ့မျက်နှာ အင်မတန် မသာယာပါ။ ဪ… ဒီတစ်လအတွက် ကိုမင်းဟန် သလိပ်စစ်ချိန်တောင် ရောက်မှကိုး။
ကိုမင်းဟန်ကို ကျွန်တော် စတင်သတိထားမိတာက မန္တလေးက ဒေါက်တာဦးခင်မောင်စိုး ဆေးခန်းမှာ။ ဦးခင်မောင်စိုးက အသည်းရောဂါ ကုသည်။ ဒေါသကြီးသည်ဟု နာမည်ကြီးသော ကုလားဆရာဝန်ကြီး။ ဗမာစကားကို မည်မျှ ပတ်ပတ်နပ်နပ် တတ်ပါသနည်းဆိုသော် သူ့နာမည် ခင်မောင်စိုးအား သူ့ဘွဲ့နှင့်ကပ်ကာ ဒေါက်တာခင်မောင်စိုးလို့ သမားရိုးကျ ခေါ်တာပင်မကြိုက်။ ဒေါက်တာဦးခင်မောင်စိုးဟု ကြားက ဦးတပ်ခေါ်ရသေးသည်။
"ဆရာဝန်ဆိုတာ ဘုရင်ပဲ၊ မင်းတို့ ငါလုပ်ခိုင်းတဲ့အတိုင်း လက်မခံနိုင်မှတော့ ငါ့ဆေးခန်းလည်း ဘာလို့လာကုနေသေးသတုန်း"
ဤမည်သော ပီယဝါစာ ချစ်ဖွယ်စကားတို့ကို သူသည် သူ့လူနာအများအား စိတ်ပေါက်ပေါက်ရှိတိုင်း ပြောတတ်ပေရာ၊ အကြောင်းမသိသူ စာရှုသူများက သူ့ထံမှာ လူနာပါးလျားမည် ထင်စရာရှိသော်လည်း ထိုစဉ်က သူ့ဆေးခန်းမှာ အရှိများသော ကျွန်တော်ကမူ အဆူအငေါက်ခံနေရသည့် ကြားက လူနာတွေ အင်မတန်များခဲ့ကြောင်း ထပ်လောင်း၍ဆိုရပါမည်။ သို့သော် ယခုစာကား ဒေါက်တာခင်မောင်စိုးကြီး အကြောင်းထက် ကိုမင်းဟန်အကြောင်းသာ။
ကိုမင်းဟန်မှာ ဘယ်လိုက ဘယ်လို ဘယ်သူတွေညွှန်း၍ မသိ၊ သူ့ အမေ အသည်းရောဂါကုဖို့ ဦးခင်မောင်စိုးဆေးခန်းသို့ ရောက်လာသည်။ အဲဒီတုန်းက အသည်းဆေးတစ်လုံး နှစ်သိန်းစွန်းစွန်း။ တစ်လ နှစ်ကြိမ်ထိုးရသည်။ ဓာတ်ခွဲခန်းမှာ မကြာမကြာ သွေး စစ်ရသည်။ တစ်ခါစစ်သော် လေးငါးခြောက်သောင်းမှ တစ်သိန်းကျော်ကျော် ကျတဲ့အခါလည်း ရှိသည်။
တစ်ရက်တော့ အဲဒီတုန်းက ကျွန်တော်အလုပ်လုပ်ရာ ဓာတ်ခွဲခန်းသို့ ဦးခင်မောင်စိုး ဖုန်းဆက်ခေါ်၍ ကိုမင်းဟန် အမေအတွက် သွေးသွားဖောက်ပေးရသည်။ အသည်းပိုး အကောင်အရေအတွက် စစ်တာမို့ ဓာတ်ခွဲစရိတ် တစ်သိန်းကျော်ကျော်။ ဒီမှာ ကိုမင်းဟန်သည် ဒေါက်တာခင်မောင်စိုးကို မည်သို့ စောဒကတက်လိုက်သည် မသိ-
"ဆရာဝန်ဆိုတာ ဘုရင်ပဲ၊ မင်းတို့ ငါလုပ်ခိုင်းတဲ့အတိုင်း လက်မခံနိုင်မှတော့ ငါ့ဆေးခန်းလည်း ဘာလို့လာကုနေသေးသတုန်း" ဟူသော ပီယဝါစာ ချစ်ဖွယ်သော ကုလားသံဝဲဝဲကို ပီပီမြည်မြည်ကြီး ကြားလိုက် ရပါတော့သည်။ အဲဒီတုန်းက ကိုယ့်လူ ကိုမင်းဟန်မှာ ဆရာဝန့်ရှေ့ ခြေစုံရပ်ပြီး မျက်လွှာလေးချလို့။ ကျွန်တော့်မှာလည်း ကိုယ့်နယ်ကလူ ကိုယ့်ရှေ့မှာ အငေါက်ခံနေရတော့ အနေရအထိုင်ရ ခက်တာလိုလိုကြီး ဖြစ်လို့။
"ဆရာဝန်ကြီးကလည်း သဘောတော့ကောင်းပါရဲ့၊ စိတ်ကြီးပြီး အပြောပက်စက်လိုက်တာ ဆရာလေးရာ၊ ဒါပါပဲဗျာ။ ကံပေါ့၊ ကျုပ်တို့လည်း ဆက်ပြီး မတတ်နိုင်တော့ဘူး၊ ဒီတစ်ပတ်ဆေးထိုးပြီးရင် နယ်မှာပဲ ပြန်ကုတော့မယ်"
အဲဒီကနောက် ကိုမင်းဟန်ကို ကျွန်တော်မတွေ့ရတော့။ နှစ်တစ်ချို့ကြာသွားသည်။
ဇာတိမြေ မတ္တရာဆေးရုံလေးက တီဘီဌာနမှာ ဓာတ်ခွဲမှူးအဖြစ် ကျွန်တော်တာဝန်ပြန်ကျချိန် တစ်ရက်သား ပိန်ခြုံးပြီး ပါးရိုးငေါငေါနှင့် လူရုပ်ပင်မပေါက်တော့သော ကိုမင်းဟန်ကို ဆိုက်ဆိုက်မြိုက်မြိုက်တွေ့ရသည်။ ကိုမင်းဟန် ကျွန်တော့်ကို မှတ်မိပုံမရပါ။
"ဆရာ၊ ကျွန်တော့်ကို တမြန်နေ့ကတည်းက အိမ်ပြန်ပို့မယ် ပြောနေတာ၊ အခုထိ လာမခေါ်ကြလို့၊ အဲဒါ ဒီမှာလည်း ပြဿနာတွေ တက်နေကြတယ် ဆို၊ အကျိုးအကြောင်းလေး သိချင်လို့"
အဲဒီတုန်းအခါမှာ ကိုမင်းဟန်ဟာ ဆေးယဉ်ပါးတီဘီလူနာ။ တီဘီမှာက လက်ရှိအချိန်အထိ အဆင့်သုံးဆင့်ရှိသည်။ ရိုးရိုးတီဘီ၊ ဆေးယဉ်ပါးတီဘီနှင့် ကုရာနတ္ထိ ဆေးမရှိသေးသော ဆေးမတိုးတီဘီ။
ရိုးရိုးတီဘီအတွက် စားဆေးခြောက်လ ပုံမှန်သောက်ရသည်။ ဆေးယဉ်ပါးတီဘီကတော့ စာဆေးအပြင် ထိုးဆေးနှင့်ပါ အထူးကြပ်မတ်ပြီး ကုတာမို့ အထက်မြန်မာပြည် တီဘီရောဂါတိုက်ဖျက်ရေးဌာနရှိရာ မန္တလေးတိုင်း၊ ပုသိမ်ကြီးဆေးရုံမှာ နှစ်နှစ်တိတိတက်ပြီး ကုရသည်။ ဆေးမတိုးတီဘီအတွက်မူ အခုထိ ဆေးမပေါ်သေး။
ကျွန်တော့် ဇာတ်လိုက်ကြီး ကိုမင်းဟန်၏ ရောဂါကား ဒုတိယအဆင့်၊ ဆေးယဉ်ပါးတီဘီ။ သူပုသိမ်ကြီးမှာ ဆေးရုံတက်နေရသည်။ သို့သော် ကိုမင်းဟန် ကံကောင်းသည်ပါသည်။ သူဆေးရုံတက်ပြီး မကြာမီ၊ တီဘီရောဂါတိုက်ဖျက်ရေးကို တိုးချဲ့လုပ်ဆောင်မည်ဟု ကုထုံးအသစ်၊ နည်းလမ်းအသစ်တွေ ချလိုက်သည်။
တီဘီလူနာသည် မိမိနေထိုင်ရာ မြို့နယ်ရှိ နေအိမ်မှနေ၍ ကုသမှု ခံယူနိုင်သည်။ ကုသချိန်ကလည်း အရင်လို နှစ်နှစ်မဟုတ်တော့။ လနှစ်ဆယ် ဆေးထိုး၊ ဆေးသောက်ကာ ကုရမည်။ ထိုအတွက် သက်ဆိုင်ရာ မြို့နယ်၊ ကျေးရွာတာဝန်ခံ သူနာပြုဆရာမက တာဝန်ယူစေ။
အဲဒီမှာ စောစောက ကျွန်တော်စာဖတ်နေစဉ် ဓာတ်ခွဲခန်းထဲဝင်လာကာ ကိုမင်းဟန်၏ သလိပ်ခွက်ယူလာပေးသော ဆရာမလေး မဝင်းဝင်းမေတစ်ယောက် ကံဆိုးရှာပါတော့သည်။ ပထမ ကံဆိုးသည်ကား ကိုမင်းဟန်ကို သူ့ရွာပြန်ပို့မယ် ဆိုတော့ ရွာခံတွေအား မဝင်းဝင်းမေက ကျန်းမာရေး ပညာပေးရသည်။
"ရှင်တို့ရွာသား ကိုမင်းဟန်ဖြစ်တဲ့ ရောဂါဟာ အမ်ဒီအာ တီဘီ (MDR TB) ခေါ်တယ်။ တော်ရုံဆေးမတိုးဘူး။ တီဘီဆိုတာ လေထဲကနေ ကူးတတ်တဲ့ရောဂါဖြစ်တယ်။ ဒီတော့ကာ…"
ဆောင်ရန်၊ ရှောင်ရန်နှင့် သတိပြုဖွယ် ဗဟုသုတ အဖြာဖြာကို မဝင်းဝင်းမေသည် အာဝဇ္ဇန်းကောင်းကောင်းနှင့် မည်မျှအထိ နှုတ်ခွန်းခြွေလိုက်သည် မသိပါ။ ကိုမင်းဟန်နေရာ ပြည်ကမ္ဘာဖြစ်သော ထိုရွာလေးမှာ အရေးအခင်း ဖြစ်ပါတော့သည်။
ကိုမင်းဟန် ဆေးရုံကဆင်းပြီး ရွာပြန်မည့်နေ့ ရွာထိပ်က ကားလမ်းကို ပိတ်ကာ ရွာသားတွေဆန္ဒပြကြသည်။
"ဒီရောဂါသည်ကြီး အလိုမရှိ"
ရုတ်ရုတ်သဲသဲတွေ ဖြစ်လို့ ဆေးရုံကဆင်းရမည့်နေ့မှာ ကိုမင်းဟန်ကို ပုသိမ်ကြီးဆေးရုံမှ မခေါ်နိုင်သေး။ ကာလကြီးကလည်း ထစ်ခနဲ့ဆို ဆန္ဒပြကြသည့် ဦးသိန်းစိန်အစိုးရလက်ထက်လွတ်လပ်စ၊ ထကြွစ ဒီမိုကရေစီ ခေတ်ဦးကာလ။ ရွာသားတွေမှာ ဆန္ဒပြရတာ ခံတွင်းလှိုက်နေချိန်။ တစ်လောလေးကမှ အသိမ်းခံလယ်မြေများ ကိစ္စနှင့်ပတ်သက်ပြီး တစ်ရွာလုံးထွက် ဆန္ဒပြကြစဉ် သတင်းစာ၊ ဂျာနယ်တွေမှာ သူတို့ရွာပါတာကို သဘောခိုက်နေ ကြချိန်။
အခု တစ်ရွာလုံးကို ကူးစက်နိုင်သည့် ရောဂါသည်ကြီး သူတို့ရွာပြန်လာမည် ဆိုသောအခါ အားလုံး တက်ညီလက်ညီ ဆန္ဒပြကြသည်။ သူတို့ရွာကျောင်းက ကိုမင်းဟန်၏ ကလေးနှစ်ယောက်ကို အခြားကလေးများနှင့် ခွဲကာ အခန်းသတ်သတ် သင်စေဖို့ ပြောကြသည်။ ကိုမင်းဟန်မိန်းမ၏ ကားလမ်းဘေးက ထမင်းဆိုင်ပေါက်စလေး ပိတ်လိုက်ရသည်။ အဲဒီတုန်းက မန္တလေး-မိုးကုတ် ကားလမ်းဘေးက ကိုမင်းဟန်တို့ရွာလေးမှာ ဆန္ဒပြသူတွေနဲ့ ကျန်းမာရေးက လူတွေနဲ့ စည်လို့။ ဤမျှသာလော…။
မကသေးပါခင်ဗျာ။ ဒီသတင်းကို သဲ့သဲ့ကြားသော ကိုရွှေမန်းသတင်းထောက်များက ကိုယ်တိုင်ကြွချီတော်မူလာလျှင် ဓာတ်ဆီဖိုးကုန်မည်စိုး၍ထင့် ရွာသားများကို ဖုန်းဆက်မေးကြသည်။
"ခင်ဗျားတို့ရွာမှာ ဆန္ဒပြနေတယ်ဆို၊ ဘာဖြစ်လို့တုန်း"
ဆရာမ မဝင်းဝင်းမေ အင်္ဂလိပ်လို ပြောလိုက်သော အမ်ဒီအာ တီဘီ (MDR TB) ဆိုသဟာကို ရွာသားတွေက ဘယ်လိုကြားပြီး၊ သတင်းသမားတို့ကို ဘယ်လိုဖြေလိုက်ကာ၊ သတင်းသမားများက ဘယ်ပုံ နားလည်သွားကြသည် မသိ။ ကိုမင်းဟန်တို့ နေရာ မတ္တရာနယ်မှာ အီဘိုလာ ရောဂါသည်ကြီးတွေ့လို့တဲ့ဟု မန္တလေးသတင်းတွေမှာ ပြန့်ကုန်တော့သည်။
ဆေးယဉ်ပါးတီဘီကို အင်္ဂလိပ်လို အတိုကောက်ခေါ်သော အမ်ဒီအာ ( MDR TB) နဲ့ အဲဒီတုန်းက လေဆိပ်တွေမှာ တွေ့တယ် ဘာညာနဲ့ မြန်မာပြည်မှာ နာမည်ကြီးနေတဲ့ အီဘိုလာနဲ့ နာမည်ချင်းက ခပ်ဆင်ဆင်ကိုး။
ငါ့စကော ကြောင့် ပြည်ပျက်လေပြီ။ ကိုမင်းဟန် ကလေးတွေ ကျောင်းမှာ အတန်းခွဲသင်ဖို့ ဖိအားပေးခံရသည်။ သူတို့ မိသားစု ထမင်းဆိုင်လေး ပိတ်လိုက်ရသည်။ အဲဒီအချိန် ကိုမင်းဟန် ရွာမပြန်နိုင်ဖို့ ရွာသားတွေ ဆန္ဒပြနေတုန်းမှာ မန်းသတင်းသမားတွေ ပါးစပ်ဖျား ကိုမင်းဟန်ကြီး အီဘိုလာရောဂါ ရလေသည်။ ထိုသည့် သမယဝယ် နှစ်ရက်မြောက်သောနေ့ မတ္တရာဆေးရုံ တီဘီဌာနသို့ ဆိုင်ကယ်တက်စီလေး စီးလုံးငှားကာ ပုသိမ်ကြီးမှ ကိုမင်းဟန်ကိုယ်တိုင် ကြွမြန်းလာခြင်းပင်။
"ဆရာ၊ ကျွန်တော့်ကို တမြန်နေ့ကတည်းက အိမ်ပြန်ပို့မယ် ပြောနေတာ၊ အခုထိ လာမခေါ်ကြလို့၊ အဲဒါ ဒီမှာလည်း ပြဿနာတွေ တက်နေကြတယ် ဆို၊ အကျိုးအကြောင်းလေး သိချင်လို့" တဲ့။
ကျွန်တော် သူနားလည်အောင် မဖြေရက်ပါ။ ထို့ကြောင့် ထမင်းရည်ပူလာ လျှာလွှဲလုပ်ကာ တီဘီအဖွဲ့ခေါင်းဆောင် ကျန်းမာရေးမှူးထံ လွှဲလိုက်သည်။
ရက်တစ်ချို့ ကြာသွားသည်။ တရုတ်သိုင်း ဝတ္ထုတွေထဲကလို သူတို့ မည်သို့မည်ပုံ လုပ်လိုက်သည် မသိပါ။ ကိုမင်းဟန် ရွာပြန်ရောက်သွားသည်။
ရွာခံ ဆရာမ မဝင်းဝင်းမေ ဒုတိယအကြိမ် ကံဆိုး ဒုက္ခရောက်သွားသည်။
အသို့နည်း။
ကိုမင်းဟန်ရောဂါသည် အမျိုးသားကျန်းမာရေးအဆင့် အရေးကြီး တိုက်ဖျက်ရမည့် ရောဂါ။ သူ့ကုသ ကာလက လနှစ်ဆယ်။ နေ့စဉ်မှန်မှန် ထိုးဆေးထိုးရမည်။ လစဉ်မှန်မှန် သလိပ်စစ်ရမည်။ ထိုအတွက် သူနာပြု ဆရာမ မဝင်းဝင်းမေမှ တာဝန်ယူစေ။
မဝင်းဝင်းမေသည် နေ့စဉ်မှန်မှန် ကိုမင်းဟန်အိမ်သို့သွားက ဆေးထိုးပေးရသည်။ လစဉ်မှန်မှန် ကိုမင်းဟန်ထံက သလိပ်ရဖို့ ကြိုးစားရသည်။ ဒီအတွက် မဝင်းဝင်းမေမှာ တစ်လ ထောက်ပံ့ငွေ သုံးသောင်း၊ ကိုမင်းဟန်အတွက် ထောက်ပံ့ငွေသုံးသောင်းနှင့် ဆန်၊ ပဲစသည် ရ၏။ ဤသည်မှာ လက်ရှိ တီဘီရောဂါတိုက်ဖျက်ရေး၏ မူ။
အကယ်၍ တစ်ရက်တလေ ဆေးထိုးပျက်ကွက်ခဲ့သော် မဝင်းဝင်းမေ၏ တာဝန်။ တစ်လတစ်ခါ သလိပ်စစ်ရက် နောက်မကျရအောင် မဝင်းဝင်းမေက တာဝန်ယူ။ ကိုမင်းဟန်၏ ထောက်ပံ့ငွေနှင့် အာဟာရ မှန်မှန်ရဖို့ မဝင်းဝင်းမေက ထုတ်ပေးရသည်။ ထိုသည်တို့ ပျက်ကွက်သော် မြို့နယ် ကျန်းမားရေးအစည်းအဝေးတွေမှာ မဝင်းဝင်းမေ အထောင်းခံရသည်။ အမျိုးသားကျန်းမာရေးအတွက် အရေးကြီးကုသပေးရမည့် ရောဂါသည် အမျိုးအစားကြီးကိုး။
အမယ် အမျိုးသားကျန်းမာရေး အဆင့်မို့လား မသိ၊ ကိုယ့်လူ ကိုမင်းဟန်ဟာ နည်းနည်း သွေးကြီးလာသည်။ တစ်လ ငွေသုံးသောင်း ရရမည့်ရက် မရသော်၊ မဝင်းဝင်းမေအတွက် သလိပ်ထွေး မပေးချင်ဘူးတဲ့။ ကတ်တီးကတ်တတ် လုပ်တယ်ဆိုပဲ။ ဆေးလာထိုးရင် ငြူစူသတဲ့လေ။ သူ့ကို တစ်ရက်မပျက် ဆေးထိုးကို ထိုးရမယ်ဆိုတာ သူသိနေပြီး၊ သူငြင်းရင် ဆရာမက ချော့ရမယ်ဆိုတာလည်း နားလည်နေတာကိုး။
"ဆရာမတို့ နားလည်ထားရမှာက တီဘီလူနာတွေကို ပေးတဲ့ဆေးဟာ လူကို အားနည်းစေတယ်။ စိတ်တို စိတ်ဆတ်စေတယ်။ ကျွန်တော်တို့ ကျန်းမာရေး ဝန်ထမ်းတွေဆိုတာ လူနာတွေအပေါ်မှာ ဘယ်လိုစိတ်မျိုး ထားသင့်တယ်ဆိုတာ…."
လစဉ် မြို့နယ်အစည်းအဝေးတိုင်း ဆရာဝန်ကြီးများက လူနာတွေကို သနား သည်းခံဖို့ တစ်ယောက်တလဲ လာရောက် ဩဝါဒခြွေကြပါသည်။ မဝင်းဝင်းမေ မျက်နှာကိုကြည့်ရတာတော့ လကုန်ရက်တိုင်း သာယာသည် မရှိလှပါ။ သူ့မှာ ဒီပိုက်ဆံ သုံးသောင်းအထက်က ထုတ်မပေးသေးလို့ ကြန့်ကြာရင် ကိုမင်းဟန်က ညစ်ကျယ်ကျယ်နဲ့ သလိပ်ထွေးမပေးလို့ ဒုက္ခများရရှာသတဲ့။ ဒါ့ကြောင့် ရံခါ ဌာနက အပေး နောက်ကျလျင် သူ့ထဲက စိုက်ပေးထားမှ ဟိုလူက ကြည်ဖြူသတဲ့လေ။
အင်း… သူ့ခမျာ ဒီလူ့ကို နေ့တိုင်း မနက်စောစော ထိုးဆေးသွားထိုးပေးရတဲ့ ဒုက္ခကလည်း သေးမည်မဟုတ်ပါပေ။
"လနှစ်ဆယ်တဲ့ ပြည့်ခဲလိုက်တာ ကိုအောင်မျိုးရယ်၊ ကျွန်မဖြင့် ဒီကနေ ပြောင်းသာပြေးချင်တော့တာပါပဲ"
တစ်ခါ တစ်ခါ မဝင်းဝင်းမေ ထုတ်ညည်းလျှင်
"ဓာတ်ခွဲမှူးဖြစ်တဲ့ ကျုပ်လည်း ခင်ဗျားလောက်သာ ကံဆိုးမိုးမှောင်မကျတယ်၊ ကျွန်ဝယ်ရာ အဆစ်ပါပါ မဝင်းဝင်းမေရဲ့" လို့ သူစိတ်အဖော်ရအောင် ကျွန်တော်ကပါ ကူညည်းပေးပါသည်။
လစဉ် ကျန်းမာရေး အစည်းအဝေးတွေမှာတော့ တီဘီဆေးရဲ့ စိတ်ကိုထိခိုက်စေသော ဘေးထွက်ဆိုးကျိုးတွေအကြောင်း၊ လူနာများရဲ့ နေ့စဉ်လူမှုဘဝ ဖြတ်သန်းမှု အခက်အခဲတွေအကြောင်း ဆရာဝန်ကြီးတွေ တစ်ယောက်တလဲ ကြုံသလို လာရောက်ဟောပြောကြတုန်း။
"နေ့ခင်း ဆယ့်တစ်နာရီလောက် ရအောင် ကျွန်တော် လုပ်ထားပေးမယ် ဆရာမ၊ ဆရာမ မအားရင် အဖြေကို ဖုန်းသာဆက်မေးလိုက်"
ကျွန်တော်က မဝင်းဝင်းမေကို ပြန်ဖြေပြီး၊ သလိပ်ခွက်ထားကာ သူထွက်သွားတော့ ဖတ်လက်စ စာအုပ်ကို ဆက်ဖတ်ဖြစ်သည်။
လူရမ်းကားလေး မောင်နီက မောင်ဖြူ့ကို သက်သက်ရန်ရှာ ထိုးကြိတ်သော ဇာတ်လမ်းလေး။ ကျောင်းမှာ လူစွာလုပ်သလောက် သူ့အိမ်မိသားစုဘဝမှာ သနားစရာ အခြေအနေဆိုးတွေနဲ့ ဝက်စာသယ်နေရတဲ့ မောင်နီ့အနား မောင်ဖြူ့အစ်ကို မဲကြီးကပ်သွားပြီး
"စောစောက ကျောင်းဆင်းချိန်မှာ ဟိုဘက်ရပ်ကွက်က ငါ့ညီ မောင်ဖြူကို ထိုးသွားတာ မင်းလား" ဟု မေးလိုက်တဲ့ နေရာ။
မောင်နီဟာ ပင်ပန်းနွမ်းလျနေတဲ့ မျက်လုံးလေးတွေနဲ့ မဲကြီးကို မော့်ကြည့်ပြီး ဖြေရှာတယ်။
"ဟုတ် ကျွန်တော်လုပ်မိပါတယ် အစ်ကို" တဲ့။
အဲဒီ စကားကို ကြားပြီးတာနဲ့ တစ်ပြိုင်နက် မဲကြီးဟာ မောင်နီ့မျက်နှာကို စေ့စေ့ကြည့်ကာ
"ငါ့ညီကို အနိုင်ကျင့်ချင်ဦးကွာ" ဆိုပြီး ခွပ် ခနဲ့ ထိုးချလိုက်ပါတော့သတဲ့။
စာအုပ်ထဲက ဇာတ်လမ်းရဲ့ နိဂုံးချုပ်မှာ လူဟာ ကိုယ့်မှာရှိတဲ့ ပြဿနာတွေကို သူတစ်ပါးအပေါ် လွှဲချစိတ်ဖြေခွင့် မရှိဘူးတဲ့။ ငါဒီလို ခံစားနေရလို့ သူတစ်ပါးတွေအပေါ် ဒီလိုရမ်းကားမိတာပါဆိုလို့ လောကမှာ ဘယ်သူကမှ ခွင့်လွှတ်မှာ မဟုတ်ဘဲ၊ ကိုယ့်ပြုသောကံ ပဲ့တင်သံ ကိုယ့်မှာသာ တာဝန်အရှိဆုံးပဲတဲ့။
ကျွန်တော် စာအုပ်ကို ပိတ်ပြီး၊ ဓာတ်ခွဲစစ်ဆေးမှုတွေ စလုပ်ဖို့ ပြင်လိုက်ပါတယ်။
နေ့ခင်းအမှီ မဝင်းဝင်းမေ အဆင်ပြေဖို့ ဒီနေ့ ကျွန်တော်ကူညီရမယ်လေ။ မဟုတ်ရင်တော့ ကိုမင်းဟန်ဟာ သူ့ကို ပြဿနာတစ်ခုခု ရှာမှာမလွဲ။
ကိုမင်းဟန်ကို ဒေါက်တာဦးခင်မောင်စိုး ရှေ့မှာ ခြေစုံရပ်လျှက် မျက်နှာအောက်ချ တွေ့ခဲ့ရဖူးသလို၊ မတ္တရာဆေးရုံ တီဘီဌာနရှေ့မှာ ကျွန်တော့်ကို ဘာလို့ အိမ်ပြန်မခေါ်ကြသေးတာတုန်းလို့ နားမလည်နိုင်သော မျက်နှာနှင့်လည်း တွေ့ခဲ့ရဖူးသည်။
အဲဒီတုန်းက ကိုမင်းဟန်မှာ ဒုက္ခတွေဝေလို့။
အခု ကိုမင်းဟန်ကို ဆေးထိုး၊ ဆေးသောက် ရှောင်လိုက် ငြင်းလိုက်ဖြင့် နယ်ခံသူနာပြုကို အနိုင်ကျင့်ခွင့်ရနေသော ရောဂါသည်အဖြစ် မြင်ရသည်။
တစ်ခါတလေ လောကသည် ထူးဆန်းစွာ ရောဂါသည်များကိုပင် အာဏာတစ်ချို့ လက်ဝယ်ပေးတတ်သည်။
ဆရာဝန်ကြီးဦးခင်မောင်စိုးရှေ့ တုပ်တုပ်မျှ မလှုပ်ရဲခဲ့သော ကိုမင်းဟန်မှာ သူနာပြုမလေး မဝင်းဝင်းမေအပေါ် လုပ်ပိုင်ခွင့် အာဏာလေး ရှိလာသောအခါ…။
အောင်မျိုးသူလွင်
