မနေ့က ၇၇ လမ်း ကေအမ်ဒီကွန်ပျူတာဆိုင်နားမှာ နုနုနှင့်တွေ့သည်။ ပထမနှစ်တုန်းက ကျွန်တော့်ရဲ့ တီဟီတီကျွန်းသူလေး။ သူ့လက်မှာ ကလေးလေးတစ်ယောက်ဆွဲလို့။ ကျွန်တော့်ကိုတွေ့တော့ သူက အတော်အံ့ကြီးဩဟန်နှင့် သူ့အကျင့်အတိုင်း ဝမ်းပန်းတသာနှုတ်ဆက်ပါသည်။ နုနုဟာ အခုထိ အလတ်ကြီးရှိသေးတာ။ ငယ်ငယ်တုန်းက တစ်မျိုးလှသလို အခု သုံးဆယ်ကျော်အရွယ်မှာလည်း တစ်မျိုးလှတာပဲ။ သူဟာ အခု ဘယ်နှသားများမွေးပြီးလို့ ဘယ်နှသွေးလောက်များ လှပစ်လိုက်တာပါလိမ့်၊ ဝါစိုစိုဝင်းလို့။
"နင်ရော အိမ်ထောင်ကျပြီလား ကိုမျိုး" တဲ့။
ကျွန်တော့်အားနည်းချက်ကလည်း နာမည်ကို အပြည့်အစုံမခေါ်ဘဲ ကိုမျိုးလို့ခေါ်ရင်ကို သိပ်ကြိုက်တတ်တာ။
"ငါမင်္ဂလာတော့ ဆောင်ဖြစ်လိုက်သေးတယ်"
လူတွေကို သိပ်ဖွင့်ဟမပြောချင်တဲ့ အိမ်ထောင်ရေးပတ်သက်မှုတစ်ခုခုပဲ ကြုံခဲ့တာလိုလို နိမိတ်ပုံဆောင်ပြီး ဖြေလိုက်သည်။ တကယ်တော့ အဲဒါ နုနုကိုမြင်ပြီးမှ လိမ်လိုက်မိတာ။ အတိအကျပြောရရင် နုနုသိပ်လှနေသေးတာလည်းပါမယ်။ ကျွန်တော်က ငါးပါးသီလမှာ မုသာဝါဒသိက္ခာပုဒ်ကို ခါးဝတ်ပုဆိုးလို မကြာခဏ ရေလျှော်လိုက်၊ မီးပူတိုက်ပြီး ခေါက်သိမ်းလိုက်၊ ထုတ်ဝတ်လိုက်လုပ်တတ်ပါတယ်။
"နင်ကြုံတဲ့အခါ ငါ့ဆိုင်လည်းလာအားပေးဦးလေ၊ ငါစာရေးကိရိယာဆိုင်လေးဖွင့်ထားတယ်" ဆိုကာ နုနုက သူ့ကားပေါ်တက်ခါနီး ဖုန်းနံပါတ်ပါတဲ့ ကဒ်လေးတစ်ခုပေးသွားရဲ့။ သူ့ကားပုပုလေး တံခါးဖွင့်ပြီး စွေ့ခနဲ့ဝင်ထိုင်လိုက်တဲ့ နုနုရဲ့နောက်ပိုင်းအလှကို အမှတ်တမဲ့ကြည့်မိရင်းက ကျွန်တော်ဟာ ခေါင်းကိုတူနဲ့နှက်တာ ခံလိုက်ရတယ်။ အဲဒါက ပထမ တူတစ်ချက်။
***
ကျွန်တော့်မှတ်ပုံတင်က မှားနေတယ်။ ပထမမှားတာ မွေးသက္ကရာဇ်။ ကျွန်တော်တို့အရွယ်တန်းတွေ ဖြစ်လေ့ရှိကြတဲ့ ပြဿနာအတိုင်း ကျောင်းအပ်တော့ အသက်ကတစ်မျိုး၊ တကယ့်လူသက်ကတစ်မျိုး။ ဒီတော့ မှတ်ပုံတင်မှာ မှားနေတယ်။ ဒုတိယအမှားက နာမည်။ ဒါလည်း အိမ်ထောင်စုဇယားမှာပါတဲ့နာမည်နဲ့ ကျောင်းအပ်တော့ပေးတဲ့နာမည်မတူတော့ မှတ်ပုံတင်မှာလွဲတော့တာပဲ။ အခု ဒီအသက်အရွယ်ကျမှ အဲဒါကြီးပြင်ရမယ်ဆိုတော့ အိမ်က ဘီဒိုထဲ အမေ့မှတ်ပုံတင်အဟောင်းတွေ၊ အိမ်ထောင်စုဇယား အဟောင်းတွေ လှန်လှောရှာရတယ်။ အဲဒီမှာ စာအဟောင်းဘီဒိုထဲက ဓာတ်ပုံအဟောင်းလေးတစ်ခု အမှတ်တမဲ့ ခုန်ထွက်လာပါရော။ ဓာတ်ပုံက ဟိုတုန်းခါဓာတ်ပုံဆိုင်မှာ ကိုယ့်ရည်းစားကိုယ်ပေးဖို့ အလှရိုက်ထားတဲ့ ပုံမျိုးလေးပါ။ ပုံနောက်ကျောမှာ စာလေးတောင် ပါသေးဗျာ။
"မောင့် အတွက်
ချစ်တဲ့...မ" တဲ့။
ဒီစာကိုဖတ်ပြီး ဒီပုံကြီးမြင်တော့ ကျွန်တော် တော်တော်ရယ်ချင်ပက်ကျိဖြစ်သွားတယ်ခင်ဗျ။ ပုံထဲမှာ တော်တော့်ကို ရုပ်ဆိုးတဲ့ မိန်းမတစ်ယောက်ရှိတယ်။ မလှလှအောင်ရိုက်ထားတဲ့ ပုံထဲမှာတောင် သူ့ရုပ်က တော်တော့်ကို ပြေပြေပြစ်ပြစ် မရှိတာကလား။ သက္ကရာဇ်တွေကို တွက်စစ်တော့ အခု ကျွန်တော်မြင်နေတဲ့ ဓာတ်ပုံရှင်ဟာ အဲဒီတုန်းက အသက်အစိတ်ကျော်ကျော်အရွယ်လောက် ဖြစ်မယ်ပေါ့။
"မောင့်အတွက်" တဲ့။
"မ" တဲ့။
အနားမှာ တူတစ်ချောင်းချောင်းရှိမနေခဲ့ဘူး။
***
တီဟီတီကျွန်းလေးအကြောင်း ဖတ်ဖူးကြလား။ နောက် ၁၉၅၇ ခုနှစ်လောက်ဆီက မြဝတီမဂ္ဂဇင်းပါ 'တီဟီတီလမ်းကြား' ဆိုတဲ့ ဝတ္ထုတိုလေးကိုရော။
***
ရည်းစားဦးနဲ့အချစ်ဦးဟာ များသောအားဖြင့် မတူတတ်ဘူးခင်ဗျ။ တချို့ကံကောင်းတယ်ပြောရမလား၊ ကံဆိုးတယ်ပြောရမလား၊ ကံမဆိုးမကောင်းလို့ ပြောရမလားပေါ့လေ... အဲဒီ တချို့တချို့တော့ ရည်းစားဦးနဲ့ အချစ်ဦးဟာ ထပ်တူကျမယ်ထင်တယ်။ ရည်းစားဦးမြေးဦးရတောင် မမေ့ဘူးဆိုတာ အဲဒီလိုမျိုးလူတွေအတွက်ပဲ ဖြစ်မယ်။ အခု ကျွန်တော့်ရည်းစားဦးနာမည်ကို ဖော်မရတော့ဘူး။ ပထမနှစ် သူနဲ့ဖြစ်တုန်းက ကျွန်တော်က 'မိန်း' လို့ အများခေါ်တဲ့ မန်းတက္ကသိုလ်ဝင်းထဲနေတာ။ လက်ရှိ ၇၃ လမ်းပေါက်ကနေ ဝင်သွားပြီးတဲ့အခါ ဘောလုံးကွင်းရှိတဲ့ညာဘက်ကိုချိုး၊ နောက်ထပ်ဘယ်ပြန်ချိုးရင် လောလောဆယ်တော့ ဈေးဆိုင်တန်းတွေတွေ့ရမယ်။ အရင် ကျွန်တော်တို့နေတုန်းက အဲဒါ ထရံကာသွပ်မိုး လိုင်းခန်းပုပုလေးတွေ။ ကိုယ့်လိုင်းခန်းရှေ့ကိုယ် ကြံရည်ဆိုင်လေး၊ လက်ဖက်ရည်နဲ့အသုပ်ဆိုင်သဘောမျိုးလေးတွေ ဖွင့်ကြတာမျိုးရှိပေမယ့် အဓိကက လူနေတာများတယ်။ ထရံကာ သွပ်မိုး မြေစိုက် နေကျော်ဆောင်တွဲကြီး။ တစ်ခန်းနဲ့တစ်ခန်းက ဝါးထရံလေးတစ်ချပ်ပဲ ခြားတယ်။ ကျွန်တော်တို့ ပထမနှစ်တုန်းက အဲဒီအထဲက အခန်းတစ်ခန်းမှာ ငှားနေကြတာ။
'တီဟီတီလမ်းကြား' ဝတ္ထုတိုပါ မေတ္တာရွှေရည်လမ်းထဲက ဆယ်ပေပတ်လည် အိပ်ခန်းလေးတွေလိုပေါ့။ တီဟီတီကျွန်းသားတွေနေတဲ့ မြေစိုက်တဲဝိုင်းလေးတွေနဲ့ တူမလားပဲ။
ကျွန်တော်တို့နေတဲ့ တစ်ဖက်ခန်းမှာ နုနုကနေတာ။ သူနဲ့ အဲဒီဘက်အခန်းက လင်မယားဟာ အမျိုးတစ်ခုခု တော်တယ်ထင်ရဲ့။ ငှားနေတာ မဟုတ်ဘူးလို့တော့ မှတ်မိတယ်။ ဘယ်လိုတော်လဲ မမှတ်မိတော့ဘူး။ အဲဒီတုန်းက ကျွန်တော့်မှာ ရည်းစားဦးနဲ့။ ပြောခဲ့ဖူးတာလို အခု အမည်မမှတ်မိတော့တဲ့ အမျိုးသမီးလေး တစ်ယောက်ပေါ့။ လူတစ်ယောက်နဲ့တစ်ယောက် သမီးရည်းစားဖြစ်နေကြခြင်းမှာ အချစ်ဆိုတဲ့သဘော ပါချင်မှ ပါတာဖြစ်သလို၊ တစ်ယောက်နဲ့ တစ်ယောက် ချစ်နေခဲ့ကြပါလျှက် သမီးရည်းစားအဖြစ်ကို မရလိုက်ကြတာတွေလည်း အများရှိပါတယ်။ ဒီနှစ်မျိုးမှာ ပထမတစ်မျိုးအတွက် ဆင်ခြေပေးတာမဟုတ်ပေမယ့် ရည်းစားဦးတိုင်း အချစ်ဦးဖြစ်မလာကြဘူးဆိုတာ ရင့်မှည့်ချိန် မတူလို့ပါ။ သမီးရည်းစား ဆက်ဆံရေးမှာ တစ်ယောက်နဲ့တစ်ယောက် ဘယ်လိုအပေးအယူမျှတဲ့ သည်းခံမှုမျိုးနဲ့နေကြမယ်ဆိုတာမျိုးကို သိတဲ့ နှလုံးသားရင့်မှည့်ချိန်ဟာ လူတစ်ဦးနဲ့တစ်ဦး မတူတတ်ကြပါဘူး။ မချစ်မိလိုက်ဘူးဆိုတာ သူက ကျွန်တော့်ကို ဘယ်လိုရယ်မသိပေမယ့်၊ ကျွန်တော့်အတွက် အဲဒီအချိန် ရည်းစားဦးဆိုတာ ချဉ်ချဉ်စူးစူး မူးပြီးရော အနေမျိုး။ ဒီလိုနဲ့ တစ်ချိန်မှာ တစ်ယောက်ယောက်ရဲ့ မိန်းမကောင်းလေးဖြစ်လာမယ့် ဒီကောင်မလေးကို အဲဒီတုန်းက ကျွန်တော် မချစ်ဘဲ ရည်းစားလုပ်ခဲ့မိတယ်။ ဒီလိုပဲ နောင်တစ်ချိန်ကျွန်တော့်အချစ်ဦးဖြစ်လာပြီး၊ အခုထိလည်း မတိုက်ဆိုင်ရင်တောင် အနာဟောင်းတုတ်နဲ့ဆွဆွ လွမ်းနေရသေးတဲ့ ကောင်မလေးဟာရော၊ သူ့ငယ်ရွယ်သေးစဉ် တစ်ချိန်ချိန်တုန်းက တစ်ယောက်ယောက်ရဲ့ ချဉ်ချဉ်စူးစူးမူးပြီးရော ဖြစ်ချင်ဖြစ်ခဲ့ဖူးမှာပေါ့။ အဲဒါဟာ ရင့်မှည့်ချိန်ရဲ့ သဘောပါပဲ။
နုနုရည်းစားက အဲဒီတုန်းကတည်းက ကားစီးနိုင်တယ်။ မနက်မနက် ကျူရှင်တက်ဖို့ နုနုဆီကို သူပဲ လာကြိုပေးတာ။ ကောင်လေးဟာ အဲဒီတုန်းက ကျွန်တော်တို့အရွယ်နဲ့တောင် ကောင်လေးလို့ခေါ်ချင်စရာကောင်းလောက်အောင် အသက်ရော ဝါရော ခပ်ငယ်ငယ်ပဲ။ ခေတ်ကလည်း အနဂ္ဂတို့၊ သားစိုးတို့ရဲ့ခေတ်။ စိုင်းစိုင်းခမ်းလှိုင်ရဲ့ 'ဝမ်းနည်းမှတ်တမ်း' ခေတ်။ ဒီတော့ ဒီကောင်လေးရဲ့ ဝတ်ပုံစားပုံဟာ "အင်္ကျီပွပွ၊ ဘောင်းဘီဂွကျ၊ ဘဝ.. ဘဝ" ပေါ့ခင်ဗျာ။ ကိုယ်တွေထက်တော့ အများကြီးသာပါတယ်။
ဒါပေမယ့် ကျွန်တော်တို့နေကြတာ တီဟီတီလိုင်းခန်းထဲမှာလေ။ ကျွန်တော်တို့အခန်းက သူငယ်ချင်းငါးယောက်စပ်ပြီး ငှားနေတာ။ ညညဆို ခေါင်းရင်းခန်းက လင်မယားစကားပြောရင် ဝါးထရံလေးပဲခြားတော့ အတိုင်းသားကြားနေရတယ်။ ဒီလိုပဲ ခြေရင်းဘက်နုနုတို့အခန်းဆီက နုနုအမျိုးလင်မယား ရန်ဖြစ်တဲ့အခါလည်း အတိုင်းသားကြားရတာပဲ။ ဒါပေမယ့် လင်မယားတွေဆိုတာ ညည စကားပြောတာနဲ့ ရန်ဖြစ်တာ နှစ်ခုတည်း လုပ်တတ်တာ မဟုတ်ဘူးလေ။ အဲဒီအခါလည်း ကျွန်တော်တို့ဟာ မကြားလိုနားချိုလျှက်သား ကြားကြရတာပဲခင်ဗျ။ နုနုအမျိုး အဲဒီမိန်းမဆိုတာကလည်း အမူ၊ အရူ၊ ရှူသံ၊ ရှိုက်သံတွေက များလွန်းပါတယ်။ ညသံဆိုတာ တစ်အိမ်က လေလည်သံကိုတောင် အခြားက အိမ်က ကြားရဲ့ ဆိုသမို့လား။ အဲဒါ တီဟီတီလိုင်းခန်းက နေ့စဉ်ဘဝပဲ။
အခု ဒီတီဟီတီလိုင်းခန်းအကြောင်းပြောနေရင်း နောက်ထပ် တီဟီတီတိုက်ခန်းတစ်ခုအကြောင်း ဆက်ပြောရပါဦးမယ်။ အဲဒီတိုက်ခန်းလေးရဲ့ နာမည်က 'စီဖိုက်' တဲ့။ အင်္ဂလိပ်အက္ခရာ 'စီ' နဲ့ အင်္ဂလိပ်ဂဏန်း 'ဖိုက်'။ ဆိုတော့ကာ တိုက်ခန်းတို့သဘောကို နားလည်သူများက ဒီအခန်းရဲ့ တည်နေရာကို ဆဝါးမိလောက်ပါပြီ။ မြေညီထပ်ဟာအေ၊ ပထမထပ်ကို ဘီ စသဖြင့် အမည်ပေးလေ့ရှိတော့ 'စီဖိုက်' ဆိုတာ ဒုတိယအလွှာမှာရှိတဲ့ အခန်းနံပါတ် (၅) ပေါ့ခင်ဗျာ။
တစ်ရက်သား ကျွန်တော့်ရည်းစား မမကြီးရှိတဲ့ အဲဒီတိုက်ခန်းဆီ ညကြီးမိုးချုပ် သွားလည်ဖြစ်ပါရော။ သူကတော့ ခဏခဏခေါ်ပေမယ့် ကျွန်တော်က အဲဒီတုန်းက အဲဒီအရွယ်နဲ့ဆိုတော့ သူ့အဖေနဲ့ အစ်မများကို ကြောက်လို့ သွားမလည်ဖြစ်ပါဘူး။ သူက အဲဒီ 'စီဖိုက်'မှာ သူ့အဖေရယ်၊ သူ့အစ်မ လင်မယားရယ်နဲ့နေတယ်။ သူ့အဖေက ခရီးသွားရတဲ့ဝန်ထမ်းတစ်မျိုးမို့ အိမ်မှာ သိပ်ကပ်လှတယ်မရှိတော့ အရွယ်သိပ်မကွာတဲ့ သူ့အစ်မသည်သာ သူ့အုပ်ထိန်းသူပေါ့။ အဲဒီနေ့ညတော့ သူ့အစ်မလင်မယားလည်း 'စီဖိုက်' မှာ ရှိမှာမဟုတ်ဘူးဆိုတဲ့ ရေလာမြောင်းပေးစကားတစ်ခုကြောင့် အကြံကောင်းကြီးနဲ့ ကျွန်တော်ရောက်သွားတာ။ အရင်လည်း သူကျွန်တော့်ကို ဒါမျိုးခေါ်ဖူးပေမယ့် လာမယ်ပြောပြောပြီးမှ တစ်ခုခုဆို ပြေးပေါက်မရှိတဲ့ တိုက်ခန်းဆိုတဲ့အသိကြောင့် သတ္တိကောင်းလှတဲ့ ကျွန်တော်က မသွားဖြစ်ခဲ့ဖူး။ အရသာတစ်ခုကို အရူးအမူးကြိုက်နှစ်သက်သည်ဆိုရာမယ် စားဖူးတဲ့လူလောက် မစားဖူးတဲ့လူက မက်လေ့မရှိတော့၊ အကြိုက်ထက် အကြောက်က ပိုတယ်ပေါ့ခင်ဗျာ။ ကျွန်တော်က အဲဒီတုန်းအခါ မစားဖူးသေးဘူးလေ။ သူပြောနေကျ ပုံပြင်တွေအရ သူတို့တိုက်ခန်းသားတွေဟာ လက်သံပြောင်တယ်လည်း နာမည်ကြီးတာကိုး။
'တိုင်း၍ရက်သည့် ပက္ကလာ မိုးရွာသည်နှင့် အခန့်သင့်' ဆိုတာလို ကျွန်တော် သူတို့တိုက်ခန်းအောက် အရောက်မှာ မီးက ပျက်သွားသေးဗျား။ ဒါနဲ့ တိုအောင်ပြောရရင် ကျွန်တော်လည်း ဝမ်းသားအားရ သူတို့တိုက်ခန်းပေါ်တက်၊ သူရှိရာအခန်းကိုသွားတော့ အခန်းတံခါးဟာ ပိတ်မထားပါဘူး။ အထဲမှာ အဝင်စ ဧည့်ခန်းထဲ မီးကြွေတိုက်လက်စ သူ့ကို မှိန်ပြပြမီးအလင်းမှာ မြင်ရပါတယ်။ ကျွန်တော်က သူ့နာမည်ကိုခေါ်တော့
"ကိုမျိုး လာတယ်လား" တဲ့။
ကျွန်တော်က သူ့စကားလေသံကို ကြားရတာ နည်းနည်းတော့ တစ်မျိုးကြီးပေါ့။
"ထမင်းစားချင် မီးဖိုးခန်းထဲမှာ ရှိသေးတယ်"
ကျွန်တော်ကသာ ရင်တွေတအားဖိုနေတာ၊ သူ့ဘက်က အေးစက်လှချီရဲ့။ နောက်တော့ သူက မီးပျက်သွားပေမယ့် ပူနေသေးဟန်ရှိတဲ့ မီးပူနဲ့ အဝတ်တွေ အေးအေးဆေးဆေး ဆက်ဖိနေသေးတယ်။ ဒီလိုနေတုန်း 'ဝင်း' ခနဲ့ မီးပြန်လာပါရော။ ဒီတော့ကျ ကျွန်တော်နဲ့သူ မီးရောင်ထဲ ဘွားခနဲ့ မျက်နှာချင်းဆိုင်တွေ့လိုက်ကြချိန်
"ဟယ်တော်... ကိုမျိုး"
သူက အံ့ဩပြန်တယ်။ ဝင်လာတုန်းက မအံ့ဩဘဲ မီးလာမှတကယ်အံ့ဩတဲ့သူ့ကို ကျွန်တော်တကယ်ပဲ ပြန်အံ့ဩရပါတယ်။ အဲဒီညက ကျွန်တော့် အကြံကောင်းကြီး အထမမြောက်ခဲ့ပါဘူး။ သူက ကျွန်တော့်ကို ပျားရည်နဲ့ဝမ်းချ တယ်ခေါ်မလား၊ အချိုလေးနည်းနည်းပါးပါးသပ်ပြီး လေဘာတီမမြရင်ရဲ့ "မတော်ဘူးမောင်ရယ်၊ ငရဲကြီးလိမ့်မယ်ရှင့်" ဆိုတဲ့ အထာနဲ့ ပြန်လွှတ်တာပေါ့ခင်ဗျာ။ ကျွန်တော် ပြန်ခဲ့ရပါတယ်။
ပြောရဦးမယ်ခင်ဗျ။ သူနဲ့ ပတ်သက်ပြီး ပြောချင်တာက အခုမှလာတာ။
ပထမနှစ်ပြီးတော့ ကျွန်တော့်ရည်းစားဦးနဲ့ ပြတ်ကရော။ အဲဒီမှာ ရည်းစားနဲ့ပြတ်ရင် အသည်းကွဲရမယ်ဆိုတဲ့ ပုံသေနည်းကို သိထားတဲ့ကျွန်တော်ဟာ ဟုတ်တာ မဟုတ်တာ အသာထားပြီး အသည်းတွေကွဲပါတယ်။ အသည်းကွဲတာကြောင့် ကိုယ့်မေဂျာမှာ ကျောင်းမတက်ဘဲ၊ သူငယ်ချင်းတွေရှိရာ မေဂျာတွေဘက် စိတ်ပြေလက်ပျောက်ဆိုပြီး သွားသွားတက်တယ်လေ။ အဲဒီမှာ သူနဲ့တွေ့တာပဲ။ သူက ကျွန်တော့်ထက် အသက်ကြီးတယ်။ နောက် သူက ကျွန်တော့်ကို စနောက်ချင်လို့လား၊ အတည်လားမသိဘူး ရည်းစားစာပေးတယ်။ ဒါပေမယ့် သူကံဆိုးတာက ရည်းစားနဲ့ကွဲလို့ မနေတတ်မထိုင်တတ်ဖြစ်နေတဲ့ ဒီကငနဲဟာ သူ့ကို အဟုတ်ကိုလိုချင်သွားရော။ သူကလည်း အစတော့ ကြည်ကြည်ဖြူဖြူပါ။ နောက်တော့မှ ဟိုကဖျက်၊ သည်ကဖျက်နဲ့ သူ့သူငယ်ချင်းမမတွေက ဖျက်လို့ "သူငယ်ချင်းလိုပဲ ဆက်၍ခင်မည်မောင်" ဖြစ်လာပါရော။
ကျွန်တော်က အဲဒီတုန်းက အခုလိုစာတွေ မရေးတတ်သေးဘူး။ ဒါပေမယ့် ရည်စားစာတော့ တော်တော်ရေးတတ်တယ်။ အဲဒါ မမကြီးက ဖြတ်လိုက်ရပါ့မလားဆိုပြီး ရေးလိုက်တဲ့ရည်းစားစာကို အခုထိမှတ်မိသေးတယ်။ ဘာလို့ဆို အဲဒါ စိုင်းစိုင်းခမ်းလှိုင်ရဲ့ သီချင်းစာသား
"လူကြောင့်လား၊ ငွေကြောင့်လား၊ မသိနိုင်ဘူးချစ်သူရာ၊ မှောင်ရီဝေတဲ့ ဆောင်းတွင်းညမှာ လမ်းခွဲရတာ၊ မော်ဒန်အချစ်ဇာတ်လမ်းတွေထဲ၊ ပိုက်ဆံဆိုတာ အသည်းခွဲတဲ့ လူကြမ်းကြီးပါပဲ" တဲ့။ ဒါလေးအပါအဝင် သုံးမျက်နှာကျော်ကျော်ရှိတဲ့ စကားနာထိုးစာရှည်ကြီး ရေးဆက်လိုက်တာ မမကြီးဟာ မနက်လင်းလင်းချင်း ကျွန်တော့်အဆောင်ရှေ့ 'ဖုတ်' ခနဲ့ ကြွေဆင်းလာပါရော။ အဲဒီနောက် သူ့ရည်းစားဖြစ်တော့တာပဲ။
ဒါပေမယ့် သူနဲ့ လူမြင်ကွင်းမတွဲရဘူး။ သူ့သူငယ်ချင်းတွေရှေ့ နှုတ်မဆက်ရဘူး။ သူချိန်းတဲ့အချိန်မှ သွားတွေ့ရတယ်။ သူ့တို့မေဂျာကိုလည်း အရင်လို လက်လွတ်စပယ်လာလို့ မရတော့ဘူး။ စသဖြင့်ပေါ့ဗျာ စည်းကမ်းတွေ စည်းကမ်းတွေ။ အခုခေတ် အသုံးတွင်လာတဲ့ စကားတစ်ခု 'ဆိုင်းလင့်တွဲတယ်' ဆိုတာကို ကျွန်တော်က နှစ်ထောင်ခုနှစ်ကျော်စ ကာလတွေကတည်း ခံဖူးတာ။
သို့သော် ကိုယ့်မှာ အခြားရည်းစားသနာလည်း တွဲစရာမရှိတော့ ကြိုက်မရှက်မဟုတ်တောင် ငတ်လို့မရှက်ပါဘူး။
သူငယ်ချင်းတွေကဆို ညည သူနဲ့သွားချိန်းတွေ့ပြီးပြန်လာတိုင်း စတယ်။
"တို့ကောင်ကြီးတော့ သက်ကြီးပူဇော်ပွဲက ပြန်လာပဟေ့" တဲ့။
သိပ်ကိုခင်မင်ရတဲ့ အပေါင်းအသင်းတစ်ယောက်ကဆို မျက်နှာပူပူနဲ့ အမုန်းခံပြောတာ မှတ်မိသေးတယ်။
"ကိုမျိုး... မင်းဘယ်လိုစိတ်ကူးနဲ့များ အဲဒီတစ်ယောက်နဲ့ကြိုက်ပစ်လိုက်တာလဲ" တဲ့။
ဒီလိုမေးတော့ကျ 'ငတ်လို့' လို့ ဖြေရမှာ ရှက်သေးဗျ။ ဒါနဲ့ ကျွန်တော့်မှာ ရှက်ရှက်ရှိ သွားဖြဲနေရတယ်။
သူ့အစ်မကတော့ ကျွန်တော့်အပေါ် အင်မတန်သဘောမနောကောင်းပါရဲ့။ နောက်ပိုင်း သူနဲ့ကျွန်တော် ဖြစ်နေတာသိတော့ အိမ်ကို ထမင်းခေါ်ဖိတ်ကျွေးတယ်။ ကျွန်တော်က မလိုက်ရဲတော့၊ အဆောင်ထိလာဖိတ်တယ်။ အင်မတန်ဖော်ရွေတယ်။ ဖော်ရွေလွန်းတာမှ ကျွန်တော်ကတောင် အားနာယူရတယ်။ "ဘယ်တော့ယူကြမတုန်း၊ ဘယ်တော့ယူကြမတုန်း" နဲ့ မေးတာလည်း အခါခါ။ ဒီကကောင်ကလည်း မမကြီးကိုထားလို့ မမကြီးရဲ့ အစ်မဆွယ်တာနဲ့ပဲ တော်တော့်ကို မိန်းမလိုချင်လာတယ်။
ကျွန်တော်ပထမနှစ်တုန်းက တီဟီတီလိုင်းခန်းထဲလည်း နေဖူးတာကိုး။
တီဟီတီကျွန်းသူကျွန်းသားတွေဟာ ဃရာဝါသလူ့ကိစ္စမှာ အလွန်ပဲပွင့်လင်းကြသတဲ့။ သူတို့ဟာသူတို့ရဲ့ မြေစိုက်တဲငယ်လေးတွေထဲမှာပဲ ယောက်ျားမိန်းမ အိမ်ထောင်းရေးအရ ဆက်ဆံနှီးနှောပြုတဲ့အခါ တစ်အိမ်လုံးက ဘယ်သူပဲ မြင်မြင် ရှက်စရာမထင်ကြဘူးတဲ့။ ဒါကြောင့်ပဲ တီဟီတီကျွန်းက ငယ်ရွယ်သူကလေးငယ်တွေဟာ အရွယ်မရောက်သေးတာတောင် လောကီလူ့ကိစ္စတွေမှာ အင်မတန်စိတ်ဝင်စားလျှက် ဖျတ်ဖျတ်လူးကြဆိုပဲ။
ဒီအကြောင်းအခြေခံကို ပြလို့... တစ်ဖက်အိမ်ခန်းက ကုလားလင်မယား ညည အတူနေကြတဲ့အခါ အခင်းကြမ်းတလှုပ်လှုပ်ကြောင့် စိတ်လှုပ်ရရှာသူလေး မပန်းအကြောင်း။ နောက်တော့တဖန် အခြားတစ်ဖက်ခန်းက ကားဒရိုင်ဘာ မောင်အုပ်မူးလားပြီး သူ့မိန်းမသူ ဟိုဟာပြုတဲ့အခါ ကျူထရံလေးသားခြားပြီး ဒီဘက်က အတိုင်းသားကြားနေရလောက်အောင် နုံခြာတဲ့လူနေမှုဘဝမှာ တဖြည်းဖြည်း ကာမရောဂါ ကိုယ်တွင်းနာကပ်ပြီး စုန်းပူးရှာသူ အပျိုကြီးမနန်းအကြောင်း။ တစ်ဆောင်တည်း တစ်ခန်းတည်းနေတာမို့ သက်ကြားအိုကြီးဦးတုတ်ပေါမှာတောင် ပုတီးလက်ကလွှတ်ပြီး သူ့မယားအမယ်ကြီးနဲ့ ငယ်မူပြန်မိသေးတဲ့အကြောင်း။ ဒီအကြောင်းတွေကို အနုပညာရသပါပါ ခြယ်မှုန်းပြထားတဲ့ ဝတ္ထုတိုလေးလေးနာမည်ဟာ 'တီဟီတီလမ်းကြား' တဲ့။ ကျွန်တော်ဟာ အဲဒီလို တီဟီတီလမ်းကြားမျိုးလေးထဲ ပထမနှစ်မှာ နုနုနဲ့တစ်ခန်းလေးသာခြားပြီး နေခဲ့ဖူးတယ်။
တစ်ရက်တော့ နုနုက ကျွန်တော့်ကိုခေါ်တယ်။
"ကိုမျိုး" တဲ့။
အဲဒါ သူ ကျွန်တော့်ကို ပထမဆုံးခေါ်တာ။ အဲဒီရှေ့မှာ သူနဲ့ကျွန်တော်ဟာ ချောင်းကြည့်ပြုံးပြန်ပဲ။ သူ့မှာ ကျွန်တော့်ထက် အပြန်တစ်ရာသာတဲ့ ရည်းစားမောင်ရှိတယ်။ ကျွန်တော့်မှာ ကောင်မလေးရှိတာလည်း သူသိတယ်။ သိတာမှ ကျွန်တော့်ကောင်မလေးနဲ့ကျွန်တော် အဆောင်ထဲ ချိန်းတွေ့တဲ့အခါ ကျန်တဲ့သူငယ်ချင်းတွေ လက်ဖက်ရည်ဆိုင်ပြေးကြရတာပါ သူသိတယ်။ ဒီတော့လည်း သူက ဘယ်လောက်မိုက်ပြီး ကိုယ်က ဘယ်လောက်ကြိုက်နေသော်မှ ချောင်းကြည့်ပြုံးပြန်ထက် ပိုမလှမ်းဝံ့ပါဘူး။
ဒါပေမယ့် အဲဒီညနေကတော့ သူကျွန်တော့်ကို အဲဒီလို မခေါ်စဖူးခေါ်ပြီး တစ်နေရာ လိုက်ပို့ခိုင်းတယ်။ ဘယ်နေရာလဲ ကျွန်တော်မမှတ်မိတော့ဘူး။ ကျွန်တော်က စက်ဘီးလေးနဲ့သူ့ကို တင်ပြီး လိုက်ပို့တယ်ပေါ့။ နောက်တော့ ရေရေရာရာမရှိဘဲ ဟိုရောက်ဒီရောက် ရောက်သွားကြတယ်။ သူကစိတ်ညစ်လို့ အိမ်မပြန်ချင်ဘူးတဲ့။
ဒီနေရာမှာ နိုင်ငံခြားဟာသလေး ကျွန်တော်က ညှပ်ပြောချင်လာတယ်။ တစ်ခါသား တစ်ဖက်အိမ်ခန်းက မိန်းမတစ်ယောက်ရဲ့ ညည်းညူသံကြောင့် ဘာကူညီရမလဲလို့ ယောက်ျားပျိုလေးက အိမ်ထဲအပြေးဝင်သွားသတဲ့။
"မောင်လေးရယ်၊ မမခေါင်းတွေကိုက်လိုက်တာ ခေါင်းလေး နှိပ်ပေးပါနော်"
"ဟုတ်ကဲ့မမ"
ကောင်လေးက အမျိုးသမီးကို ခေါင်းနှိပ်ပေးတယ်။
ခဏကြာတော့
"ခေါင်းကတော့သက်သာလာပါပြီ၊ အခု ဗိုက်တွေနာတယ်ကွယ်၊ ဗိုက်လေးနှိပ်ပေးပါဦး"
ဒီတော့လည်း လူငယ်လေးက ဗိုက်ကိုနှိပ်ပေးရသတဲ့။
သို့သော် ဗိုက်ကိုနှိပ်တာ ကြာလာတော့ ဟိုမမက အားမရတော့ဘူး။
"မောင်လေးရယ်၊ မမငယ်ငယ်က အူအတက်ခွဲဖူးတော့ အဲဒီနေရာကများ အခုနာလာသလား မပြောတတ်ပါဘူ။ မောင်လေး သေချာကြည့်စမ်းပါဦး"
ဒီတော့အခါ ကောင်ကလေး စိတ်ပူသွားပြီး
"အာ... ဒါတော့ ကျွန်တော် မလုပ်တတ်ဘူးဗျ။ ဆရာဝန်ခေါ်မှ ဖြစ်မယ်မမ" ဆိုတဲ့ပြီး တယ်လီဖုန်းဆီ လျှောက်အသွားမှာ၊ မမကြီးဟာ အင်မတန်စိတ်ဆိုးပြီး ဆဲလွှတ်လိုက်သတဲ့။
ကောင်လေးဟာ သူက စေတနာနဲ့ လုပ်ကိုင်ပေးတာတွေမှာ မမကြီး ဘာလို့စိတ်ဆိုးမှန်း စဉ်းစားလို့ကို မရဘူးတဲ့။
နောက်နောင် အသက်တွေကြီးလို့ အဲဒီကောင်လေး အိမ်ထောင်ကျချိန်၊ သားတွေသမီးတွေနဲ့ ဖြစ်လာမှ၊ သူ့အိမ်က ကုလားထိုင်တစ်လုံး ကျိုးပျက်သွားတာ ပြန်ပြင်ရင်း ဒီအကြောင်းကိုတွေး၊ တဖြည်းဖြည်း အဖြေကို ခပ်ရေးရေးမြင်လာတော့မှ
"ငါရိုးမသား၊ ဒီလောက် အ'ရသလားဟ" လို့ ကိုယ့်နဖူးကိုယ် တူနဲ့နှက်မိသတဲ့လေ။
မနေ့က ၇၇ လမ်း၊ ကေအမ်ဒီကွန်ပျူတာဆိုင်ရှေ့မှာ နုနုနဲ့ပြန်တွေ့တယ်။ ပထမနှစ်တုန်းက ကျွန်တော့်ရဲ့ တီဟီတီကျွန်းသူလေး။ သူ့လက်မှာ ကလေးလေးတစ်ယောက်ဆွဲလို့။ နုနုဟာ အခုထိ အလတ်ကြီးရှိသေးတာ။ ငယ်ငယ်တုန်းက တစ်မျိုးလှသလို အခု သုံးဆယ်ကျော်အရွယ်မှာလည်း တစ်မျိုးလှတာပဲ။ သူဟာ အခု ဘယ်နှသားများမွေးပြီးလို့ ဘယ်နှသွေးလောက်များ လှပစ်လိုက်တာပါလိမ့်၊ ဝါစိုစိုဝင်းလို့။
အဲဒီ နုနုဟာ ဟိုတစ်ချိန် မိန်းထဲကတီဟီတီလိုင်းခန်းမှာနေခဲ့ကြစဉ်ဘဝတုန်းက ကျွန်တော့်စက်ဘီးလေးနောက် ပါလာဖူးပြီး၊ အဲဒီတစ်ည သူစိတ်ညစ်လို့ အိမ်မပြန်ချင်ဘူးလို့လည်း ပြောဖူးရဲ့။ အဲဒါကို သောက်မသိတတ်စိတ်ကြီးတဲ့ ကျွန်တော်က ငါဟဲ့ယောက်ျားကောင်းဆိုတဲ့ သောက်တလွဲစိတ်နဲ့ ချော့မော့ပြီး အိမ်ပြန်ပို့ပေးခဲ့တယ်ခင်ဗျာ။ ကေအမ်ဒီကအပြန် လိပ်စာကဒ်လေးပေးပြီး သူ့ကားပုပုလေးပေါ် တက်သွားတဲ့ နုနုရဲ့ နောက်ပိုင်းအလှကိုကြည့်ပြီး ဟိုတုန်းက တော်တော်တုံးခဲ့ရပါ့မလားလို့ ကျွန်တော်ဟာ ကိုယ့်ခေါင်းကို တူနဲ့ထုချင်လာတယ်။ အဟုတ်လည်း တူနဲ့အထုခံရသလိုလို နာတယ်ခင်ဗျ။ တောက်။
သို့သော် တီဟီတီ တူနှစ်ချက်မှာ ဒုတိယအချက်က ကျွန်တော့်အတွက် အနာဆုံးပဲ။
အဲဒါ ဟိုမမကြီးကိစ္စပေါ့။ ပြောခဲ့ဖူးတာလို သူ့ကိုထားလို့ သူ့အစ်မရဲ့ ဆွယ်လုံးတွေကြောင့် ကျွန်တော်ဟာ မိန်းမလိုချင်စိတ် ငယ်ထိပ်တက်လာတယ် ဆိုရမယ်။ အဲဒါနဲ့ သူ့ညီမဖြစ်တဲ့ ကျွန်တော့်ရည်းစားမမကြီးဆီမှာ နွားသိုးလေးချိုယားလို့ အဝှေ့သင်သလို သွားသွားသွေးတိုးစမ်းရတာပေါ့။ ခေါင်းလေးဝင်ပါရစေ၊ ရှေ့လက်လေး သွင်းပါရစေဆိုတဲ့ ကန္တာရထဲက မိုးခိုကုလားအုပ်ရဲ့ အထာ။
လူပဲခင်ဗျာ။ သူရောကျွန်တော်ပါ အရှိန်တွေတက်တာပေါ့။ သို့သော် အဲဒီအသက်အရွယ်တုန်းက ကျွန်တော်ဟာ "ဟိုတယ်နဲ့ခရီးသွားလာရေး" ဘာသာရပ်ကို နည်းနည်းမှ မသိတတ်ဘူး။ ဒီတော့ ကြံလိုက်မှဖြင့် တဆုံး။ ကြက်ဥလိုချင် ကြက်မမွေးရမယ်ချည်း မှတ်တာပေါ့။ အဲဒါနဲ့ တစ်ရက်ညနေတော့ ချိန်းတွေ့ရင်း အရှိန်ကောင်းလွန်းသွားလို့ အဲဒါကြီးကျွန်တော်က ဆိုင်ကယ်ပေါ်တင်ပြေးဖို့လုပ်ပါရော။ ဆိုင်ကယ်က သူ့ဆိုင်ကယ်ပါ။ မောင်းတာက ကျွန်တော်။ သို့သော် ဒါလည်း အထမမြောက်လိုက်ပါဘူး။ ဟိုသူငယ်ချင်းအိမ်သွားရမှာလိုလို၊ ဒီသူငယ်ချင်းအိမ်သွားရနိုးနိုး ဘယ်သွားရမှန်းမသိ ယောင်တောင်တောင်ဖြစ်နေတုန်း ကျွန်တော်တို့ ဆိုင်ကယ်နောက် ဆိုင်ကယ်တစ်စီးနဲ့ လူတစ်ယောက်လိုက်လာတယ်။
"ဟယ်တော် ကိုမျိုး"
ဒီတစ်ခါ သူ တ' လိုက်တဲ့ ကိုမျိုးဆိုတာ ကျွန်တော် မဟုတ်ဘူးဗျ။ အဲဒီ နောက်ကလိုက်လာတဲ့လူကို တတာ။ ဟိုလူက ရှူးရှူးရှဲရှဲနဲ့ တကယ်စိတ်ဆိုးနေပုံမျိုး။ သူ့ဆိုင်ကယ်ထောက်ကို ဆောင့်ထောက်ပြီး ဆိုင်ကယ်ကာဘာတွေကို တဖုန်းဖုန်းကန်ခွဲနေတယ်။
"ကိုမျိုး မလုပ်ပါနဲ့၊ ကိုမျိုးမလုပ်ပါနဲ့"
ကျွန်တော့်နောက်က မမကလည်း ဒါကိုပဲ အသည်းအသန် တားနေတယ်။
"ကိုမျိုးက မ ခဲအိုလေ။ အစ်မယောက်ျား။ သူ စိတ်ဆိုးရင် ရတာမဟုတ်ဘူး"
သူက ကျွန်တော့်ဘက်လှည့်ပြီးလည်း သူ့ခဲအိုအကြောင်း မိတ်ဆက်ပြောသေးတာ။ နောက်တော့ စိတ်ပေါက်လို့ချက်ချင်းမတ်တပ်ခိုးပြေးမယ့် အစီအစဉ်လည်း အဲလိုတွေကြုံရအပြီး စိတ်နဲ့အတူ ပျက်ကရော။
နောက်တော်တော်ကြာတဲ့အထိ အဲဒီ (အခုကျွန်တော်နာမည်ဖော်မရေးလိုတော့တဲ့) မမနဲ့က အဆက်အသွယ်မပြတ်ပါဘူး။ သူ့ရဲ့ လူမသိသူမသိ ရည်းစားလေးပေါ့။ ချိန်းတော့သွားတွေ့၊ ပျားရည်နဲ့ဝမ်းချရင်လည်း ဝမ်းဝတဲ့အထာနဲ့ ပြန်ခဲ့ရတာပါပဲ။
သို့သော် လူဆိုတာ အသက်ကလေးရလာတော့ အထာလေးတွေနပ်လာတယ်။ ပေါင်းချိန်သင်းချိန်ကြာလာတော့ သတင်းလေးတွေ စပ်လာတယ်။ တကယ်တော့ သူနဲ့ သူ့ခဲအိုဟာ ဘာဂလိုတိုတိုဗျ။ ဘဲကြီးက အစ်မဖြစ်သူကိုသာယူထားတာ၊ ညီမနဲ့လည်း မလွတ်ဘူး။ ဒါကြောင့်သာ အစ်ကိုကြီးတော့ အဖရာ၊ ကျွန်တော်က သူ့ပစ္စည်းလေး ဆိုင်ကယ်တင်ပြေးမယ်လုပ်ချိန် အသည်းအသန် တားတာကိုး။
တကယ်လို့ ပထမနှစ်တုန်းကသာ ကျွန်တော်ဟာ တီဟီတီလိုင်းခန်းထဲ မနေခဲ့ဖူးရင် ဒီအဖြစ်ကို တော်တော်ကြီး အံ့ဩမိမှာ။ ဘာလို့ဆို တစ်အိမ်တည်းနေတဲ့ ကိုယ့်မိန်းမရဲ့ညီမဖြစ်သူနဲ့ ဇာတ်လမ်းဖြစ်နေတာဟာ နည်းနည်းတော့ အံ့ဩဖို့ကောင်းတယ်မို့လား။ သို့သော် တီဟီတီလမ်းကြားကို ရောက်ရင် လူဟာ ဒီလိုပဲ ဖြစ်တတ်တာပဲ။ သူတို့တိုက်ခန်းလေးက ခပ်ကျဉ်းကျဉ်းလေး။ ဒီအထဲမှာ သူ့အစ်မတို့လင်စုံမယားဖက် အိပ်တဲ့အိပ်ခန်းဟာ အထပ်သားနဲ့ အခန်းပြန်ဖွဲ့ယူထားတာမို့ တကယ်လို့ မကြာမကြာ ခရီးထွက်ရတဲ့ သူတို့အဖေကြီး မရှိချိန်၊ ကျွန်တော်တို့တွေ မိန်းထဲက လိုင်းခန်းမှာ ကြားခဲ့ရတဲ့ အသံမျိုးတွေ ကျွန်တော့်မမ ကြားတဲ့အခါ ဘာဖြစ်လာမတုန်း။ တီဟီတီလမ်းကြားဆိုတာ အဲဒါပါပဲ။
သူလည်းလေ လောကီသားပေမို့ ဘယ်ရှောင်နိုင်ရှာမလဲ။
ဒါကြောင့်ပဲ ညကြီးတစ်ခါ သူ့အိမ်သွားလည်တော့ အမှောင်ထဲမှာ ဝင်လာတဲ့ကျွန်တော့်ကို "ကိုမျိုး" ခေါ်တာ၊ သူ့ခဲအိုနာမည်ကိုး။ ဒီဘဲကြီးနဲ့ကျွန်တော်က အိမ်နာမည်တူတယ်။ ဒါကြောင့်ပဲ မီးလာလို့ ကျွန်တော့်မျက်ခွက်ကြီးတွေ့တော့ မမဟာ အံ့ဩသကိုး။
ဒီအဖြစ်တွေကို သိရှိရိပ်မိနေလို့လည်း မမရဲ့ အစ်မတော်၊ ဟိုခဲအိုတော် ကိုကိုမျိုးရဲ့ မိန်းမဟာ ကျွန်တော့်ကို သူ့ညီမနဲ့ အလွန်အင်မတန်သဘောတူပြီး၊ ဘယ်တော့ယူမတုန်း၊ ဘယ်တော့ ယူမတုန်း၊ တအုန်းအုန်း လောနေတော့တာကိုး။
အောင်မယ်လေးခင်ဗျာ။ နွားမုန်းခြံထုတ်။
အဲဒါ တစ်ရက်ကတော့ ကျွန်တော့်မှတ်ပုံတင်လေး ပြင်ဖို့ကိစ္စနဲ့ အိမ်က စာဗီဒိုကို မွှေတော့မှ မမပုံက ထွက်ကျလာတယ်။ အဲဒီမှာ ကျွန်တော်ဟာ ဒီအကြောင်းတွေ ပြန်တွေးပြီး ကိုယ်နဖူးကိုယ် တုနဲ့ထုပစ်ချင်လာတော့တာပါပဲခင်ဗျာ။ ဒီတစ်ခါ တူတစ်ချက်က ပိုပြီးလည်း ပြင်းထန်သလို အခံရလည်း ပိုလို့ခက်ပါတယ်။
စဉ်းစားကြည့်ပါခင်ဗျာ။ မမကြီးရဲ့ ရုပ်ရည်ကို ကျွန်တော်ရေးပြခဲ့ပြီ။ သူနဲ့ပတ်သက်ပြီး အများတကာရဲ့ ဝေဖန်ချက်တို့လည်း ထည့်ဆိုခဲ့ပြီ။ ကျွန်တော် ဤမျှ ရေးပြတာ မလုံလောက်သော်မှ စာရှုသူက ကြိုက်သလောက်ထည့်တွေး၊ မလွန်စေရသော ရုပ်ရည်မျိုးကို အခု ကျွန်တော့်မျက်မြင်ဓာတ်ပုံကြီးက သက်သေခံနေပါသည်။ အဲဒါကြီးကိုခင်ဗျာ၊ ကျွန်တော်ဟာ မရမနေပါဆိုပြီး သူကခွာတာတောင်မှ ရည်းစားစာသုံးမျက်နှာလောက်ရေးပြီး စိုင်းစိုင်းခမ်းလှိုင်သီချင်းစာသားပါ ကူးထည့်လို့ ကြူခဲ့၊ ပိုးခဲ့တယ်။ နောက်တော့ သူက ကိုယ့်ကို လူမြင်ရာ မတွဲဘူးဆိုတော့လည်း လက်ခံတာပဲ။ တကယ်ကျ သူကိုယ်တိုင်သော်မှ တစ်ယောက်ယောက်ရဲ့ လူအမြင်မခံဘဝ။ ဒါကို ကျွန်တော်က လက်ဝေခံယူပြီး တွဲလိုက်သေးတာ။
ဟိုတစ်ချိန် ဖွန်စိတ်တွေမွှန်ပြီး၊ ဖွန်ခိုးတွေဝေနေတုန်းကတော့ သူငယ်ချင်းတွေ ဝိုင်းလှောင်ကြတာတောင် မနာနိုင်ခဲ့။
ဟော... အခု ကာလကြာလို့ မေ့လုလုရှိတော့မှ သူ့ဓာတ်ပုံပြန်တွေ့ပြီး ကိုယ်လုပ်ခဲ့တာတွေ ပြန်တွေးမိချိန်...
ကဲ... ဘယ့်ကလောက် တူနဲ့ထုပစ်ချင်စရာကောင်းသော ကျွန်တော်ပါနည်း။
အောင်မျိုးသူလွင်
၁၁၊၀၅၊၂၀၁၈
သောကြာ
နေ့ ၀၂း၂၂
