အားအားရှိ ဖေ့ဘွတ်ပေါ်တက်ပြီး ပေါပြနေတော့ အချို့က ကျွန်တော့်ကို ပေါတောတော ထင်နေကြတယ်။ တကယ်တမ်း ကျွန်တော့်မှာ တစ်နေ့ စာဖတ်ချိန် ငါးနာရီလောက်ရှိပါတယ်။ တကယ့် စာကြီးပေကြီးတွေချည်းပဲ ဖတ်တာပါ။ အချိန်ဇယားနဲ့ကိုချပြီး တစ်ရက်ကို စာအုပ်ငါးအုပ်လောက်မှ မပြီးရင် ကျွန်တော်မအိပ်ပါဘူး။ ဒီမှာ ကျွန်တော် ပြောချင်တာက စာအုပ်စာပေမှာက သူ့အဆင့်နဲ့သူ ရှိပါတယ်။ တချို့စာအုပ်တွေက ဖတ်ရလွယ်ပါတယ်။ တချို့စာအုပ်တွေက ဖတ်ရခက်ပါတယ်။ ဘယ်လိုစာအုပ်တွေက ဖတ်ရလွယ်ပြီး၊ ဘယ်လိုစာအုပ်တွေက ဖတ်ရခက်တယ်ဆိုတာကို ကျွန်တော့်အတွေ့အကြုံနဲ့ ယှဉ်ပြီး နောက်ပိုင်းမှာ ရှင်းပြပေးသွားပါမယ်။
ကျွန်တော့်ရဲ့ စာဖတ်နည်းကို ကျွန်တော့်အဖွားဆီက ရတာပါ။ ကျွန်တော်တို့ဟာ မျိုးနဲ့ရိုးနဲ့ကို ဉာဏ်ကောင်းကြတာပါ။ အဖွားက ဘာသာရေးလည်းလိုက်စားတော့ ထီပေါက်အောင် ကိုးနဝင်းပုတီးစိတ်ပါတယ်။ တစ်ဆက်တည်းမှာပဲ ခေတ်လည်းအင်မတန်မီတဲ့ အဖွားဟာ အဲဒီတုန်းက နာမည်ကြီးနေတဲ့ တီဗွီက အခန်းဆက်လွှင့်ပေးတဲ့ ချစ်စံအိမ်ကိုရီးယားကားကိုလည်း မလွတ်တမ်းကြည့်ပါသေးတယ်။ ကိုးနဝင်းနဲ့ ချစ်စံအိမ်ကို အဖွားဟာ အချိန်မတိုက်အောင် စီမံခန့်ခွဲနိုင်ပါတယ်။ သိပ်တော်တဲ့ အဖွားပါ။
တစ်ရက်တော့ ပညာရှိသတိဖြစ်ခဲ ဆိုတာလို အဖွားဟာ ပုတီးစိပ်ချိန်မှာ မစိပ်မိတော့ ချစ်စံအိမ်နဲ့ ပုတီးစိပ်ချိန် သိပ်ကပ်သွားပါတယ်။ ပုတီးကလည်း အပတ်ရေ မပြည့်ဘဲ ရပ်မိရင် အဓိဋ္ဌာန်ပျက်မှာမို့ မစိပ်လို့ မရပါဘူး။ ချစ်စံအိမ်ဇာတ်ကားကလည်း ခုနစ်နာရီဆို လာမှာမို့ အချိန်နဲ့အချိန် ကြည့်ရတာမျိုးပါ။ ဒီတော့ အဖွားဘာလုပ်ပါသလဲ။ သင်္ခနုပ္ပတ္တိဉာဏ်ကောင်းတဲ့ အဖွားဟာ အိမ်မှာ ရှိသမျှ အမေ့ပုတီး၊ အဖွားပုတီး၊ နှမလေးပုတီး၊ ပုတီးဟောင်း၊ ပုတီးမကောင်းတကောင်းတွေ အကုန်စုကိုင်တဲ့ပြီး လေးငါးကုံး ထပ်စိပ်ပစ်လိုက်ပါတော့တယ်။ အခါတိုင်း တစ်ခေါက်ပဲပြီးမယ့် ကြာချိန်အတွင်းမှာ ငါးကုံးထပ်စိပ်တော့ ငါးပတ်ပြီးတယ် ပြောလို့ရတာတာပေါ့။ ဒီတော့ အချိန်တိုအတွင်း ပုတီးအပတ်ရေလည်းပြည့် ကိုရီးယားကားလည်း မလွတ်ပါဘူး။ ဒီလိုတော်တဲ့ အဖွားရဲ့မြေး ကျွန်တော်ဟာ အဖွားပုတီးစိပ်နည်းကို စာဖတ်ရာမှာ အသုံးချတော့တာပါပဲ။
ကျွန်တော်စာဖတ်တယ်ဆိုတာ စာအုပ်အဖုံးမှာပါတဲ့ စာအုပ်နာမည်တွေချည်း ထိုင်ဖတ်ပစ်တာပါ။ တစ်နေ့ကို လေးငါးအုပ် ပြီးပါတယ်။ ခေါင်းစဉ်ချည်း ဖတ်တာများကွာ စာအုပ်ဆိုင်သွားပြီး စာအုပ်အနှောင့်လေးတွေချည်း စီဖတ်ခဲ့ရင်တောင် ရတာပဲလို့ အတွန့်တက်ချင်မလားပဲ။ ဒီလိုလည်း မဟုတ်ဘူးဗျ။ ကျွန်တော်က အရုပ်မပါရင် ဘယ်စာမှ စာချည်း မဖတ်တတ်ဘူးရယ်။ စာအုပ်တော်တော်များများ အဖုံးမှာက အရုပ်ပါတယ်လေ။ အနှောင့်မှာကျ မပါဘူး။ ပြီးတော့ ဘယ်လိုစာအုပ်တွေက ဖတ်ရခက်သလဲဆိုတာကို တစ်ဆက်တည်းပြောရရင် စာအုပ်ခေါင်းစဉ်မှာ စာလုံးဆင့်တွေပါတဲ့ ဇိနတ္ထပကာသဏီ လိုစာအုပ်မျိုးဟာ ဖတ်ရခက်ပါတယ်။ မနည်းကြီးကို စာလုံးပေါင်းဖတ်ရတာဗျာ။ အခုတောင် မမှားအောင် အသေအချာကူးထည့်ပေးလိုက်ရတယ်။ ဒါတောင် အခုထိ အသံမတွက်တတ်သေးဘူးရယ်။ ကြည်အေး ရဲ့ မီ တို့၊ ဒဂုန်တာရာရဲ့ မေ တို့လို့ စာအုပ်မျိုးကျ ဖတ်ရလွယ်တယ်။ စာလုံးမများသလို စာလုံးဆင့်တွေလည်း မပါဘူးလေ။ ဒါတောင် မေ စာအုပ်ကျ စာရေးဆရာနာမည်က ဖတ်ရခက်သေးတာ။
ဘယ်သူမှ ကျွန်တော်လောက် စာဖတ်အားကောင်းမှာ မဟုတ်ပါဘူးဗျာ။ ကျွန်တော်က နေ့တိုင်း တစ်နေ့ငါးအုပ်လောက် ပြီးအောင်ဖတ်နေတာလေ။
စာအုပ်နာမည်တွေချည်း ထိုင်ဖတ်နေတော့ ခင်ဗျားတို့ ပြောချင်တဲ့ စာအုပ်ပြော ကျွန်တော်က သိပြီးသားပဲ။ အဲလို စာဖတ်ခဲ့တာ။
စာဖတ်တယ်ဆိုလို့ ပြောရဦးမယ်ဗျ။ စာစာနဲ့ တကယ်တမ်းဖတ်တော့ သိပ်တွေးရတာကလား။ တချို့စာတွေကို ကျွန်တော် အချိန်ကာလတစ်ခု ကြာမှ နားလည်တာရယ်။
ပေါကော်လီယာဆိုလားရေးပြီး ဆရာမ ဂျူး ဘာသာပြန်တဲ့ အောက်ခြေသန်းတစ်ထောင်ဆိုတဲ့ စာအုပ်ဟာဗျာ လက်တစ်ဝါးလောက်ပဲ ရှိပြီး လက်သန်းလောက်ပဲ ထူတာမို့ ကျွန်တော်လည်း စပ်ဆော့ပြီးအတွင်းသားတွေ သွားဖတ်မိပါတယ်။ အဲဒီထဲက တိုင်းပြည်မတိုးတက်ရတဲ့ အကြောင်းလေးပါး ရေးပြထားတာ တချို့ကျွန်တော်နားမလည်ဘူးဗျ။
သူပြောတာ တိုင်းပြည်မတိုးတက်တာ ထောင်ချောက်လေးခုထဲ ပိတ်မိနေလို့တဲ့။ ထောင်ချောက်တွေက (၁) ပြည်တွင်းစစ်ထောင်ချောက် (၂) သဘာဝ သယံဇာတ ထောင်ချောက် (၃) အိမ်နီးချင်းဆိုးတွေကြား ပိတ်မိနေတဲ့ ထောင်ချောက် (၄) စီမံအုပ်ချုပ်မှု ညံ့ဖျင်းတဲ့ ထောင်ချောက် တဲ့။ ဒီမှာဗျာ ကျန်တာတွေ ကျွန်တော်နားလည်ပါတယ်။
သဘာဝသယံဇာတက ဘာလို့တိုင်းပြည်ဆင်းရဲစေသလဲ ပေါ့။ ကျွန်တော်လုံးဝ မှကို နားမလည်ပါဘူးဗျာ။ သယံဇာတရှိရင် ချမ်းတောင် ချမ်းသာရမှာမို့လား။ အခုတော့ သယံဇာတကြောင့် ဆင်းရဲတယ်ဆိုတော့ နားမလည်ပေါင်ဗျာ။ ဒီလိုနဲ့ နေလာလိုက်တာ ဟော တစ်နေ့က စာရေးဆရာ ဦးဘုန်း(ဓါတု) က ဒေါ်အောင်ဆန်းစုကြည်ဟာလည်း တိုင်းပြည်ရဲ့ သယံဇာတလို့ ရှင်းပြလိုက်မှ သယံဇာတကြောင့် တိုင်းပြည်မွဲတယ်ဆိုတာကို နားလည်တော့တယ်။ အဲဒီလို သယံဇာတကြောင့်ကိုးဗျ။ တော်လိုက်တဲ့ ပေါကောလီယာဗျာ။
စာအုပ်စာပေဆိုတာ အဲလိုပါဆို။
ဒီတော့ စာဖတ်ကြပါဗျာ။ ကျွန်တော့်လောက် မဖတ်နိုင်ရင်တောင် ကျွန်တော့်ကို စံထားပြီးသာ စာဖတ်ကြပါ။ ကျွန်တော်ဆို အခုစာဖတ်သက်ရင့်တော့ စာတွေလည်း ရေးနိုင်နေပြီလေ။ ဟိုတုန်းက ကတည်းကကျွန်တော်ရေးတဲ့ စာတွေဟာ သိပ်မြင့်တော့ လူတွေနားမလည်ကြဘူးဗျ။ စာဖတ်သက်ကလည်း ကွာတာကိုး။ ပထမဆုံးရေးဖြစ်တာတော့ ရည်းစားစာတွေဗျ။ မရယ်နဲ့လေ။ ရည်းစားစာပေမယ့် ကျွန်တော်က စာတအားဖတ်တော့ အဆင့်မြင့်မြင့်ရေးတာရယ်။ ဒါကြောင့် ဘယ်ကောင်မလေးမှ နားမလည်တော့ ရည်းစားစာမှန်းတောင် သိကြတာမဟုတ်ဘူးလေ။ သူတို့ကတော့ အရှက်ပြေ ပြောကြရှာပါတယ် ကိုအောင်မျိုးကြီး လက်ရေးက သဲမြေပွပွထဲ ခွေးလက်သည်းခြစ်ထားသလိုပဲမို့ ဘာမှကို ဖတ်မရပါဘူးတဲ့။ ထားပါလေ။ အိုင်ကျူနိမ့်တဲ့လူတွေဟာ ဒီလိုပါပဲ။ ဟော နောက်တော့ ရတနာရှိရာ ပုလဲလာဆိုတာလို ကျွန်တော့်စာတွေကို နားလည်တဲ့ ကလေးမဟာ ကျွန်တော့်ရည်းစား ဖြစ်ပါရောလား။ ကျွန်တော်လည်း ကျွန်တော့် အိုင်ကျူမြင့်ရည်းစားစာကို နားလည်ပြီး အဖြေပြန်ပေးတဲ့ အဲဒီ အမြုတေလေးကို တခါတည်းဆွဲစိလိုက်တာပေါ့။
ဒါမျိုးလက်လွတ်ခံလို့ မဖြစ်ဘူးလေ။ သူလေးဟာ အခုအိမ်မှာ ကျွန်တော့် မိန်းမဖြစ်နေပေါ့။ ဒီတော့မှ သူ့ကို ပြန်မေးရတယ်။ မိန်းမ မင်းငါပေးတဲ့ ရည်းစားစာကို ဘယ်လိုနားလည်တုန်းလို့။
ယောင်္ကျားက မိန်းမကို လူလစ်တုန်းလာပေးမှတော့ ရည်းစားစာဆိုတာ သိတာပေါ့ အကိုရယ်၊ ရှည်ရှည်ဝေးဝေးဖတ်ကြည့်မနေပါဘူး၊ ကျမကြိုက်တော့ အဖြေပြန်ပေးလိုက်တာပဲလေ မဟုတ်လို့ ဖတ်ကြည့်ရအောင်လည်း ကျမက စာမှမတတ်ဘဲ အကိုရဲ့တဲ့။ အင်းလေ စာတစ်ပုဒ်ကို မဖတ်ဘဲ အဓိပ္ပါယ်ကောက်နိုင်တဲ့ မဒမ်အောင်မျိုး အိုင်ကျူဟာ ဘယ်နိမ့်လိမ့်မတုန်း။ ဒါကြောင့်ပဲ ကျွန်တော့်လို စာဖတ်အားကောင်းတဲ့ ကောင်ရဲ့မိန်းမဖြစ်လာတာပေါ့။
ဒီတော့ ပြောချင်တာက စာဖတ်ကြပါဗျာ။ သဘောပေါက်စေချင်တာက အပြင်မှာ မိသားစုတစ်ခုရဲ့ အဓိကကျတဲ့ အလုပ်တွေကို လုပ်နေရလို့ ပင်ပန်းမှုတွေကို တစ်ခဏတာ အပန်းဖြေတဲ့အနေနဲ့ ဖေ့ဘွတ်ပေါ်မှာ လျှောက်ပေါပြနေလို့ ကျွန်တော့်ကို ပေါတောတော မထင်ကြပါနဲ့။ တကယ်တမ်း ကျွန်တော်ဟာ စာသိပ်ဖတ်သူပါ။ တစ်နေ့ကို စာဖတ်ချိန် ငါးနာရီလောက်ရှိပါတယ်။ စာအုပ် လေးငါးအုပ်ရဲ့ ခေါင်းစဉ်တွေချည်း စာလုံးပေါင်း ဖတ်နေရုံနဲ့ ငါးနာရီကြာသလားကွာလို့ ခင်ဗျားက စောဒကတက်မလို့လား။ အဲဒါပဲလေ။ ခင်ဗျားမှ မသိတာ။ ကျွန်တော်စာဖတ်တယ်ဆိုတာ ကလေးထိန်း အနှီးလျှော်ရင်း ဖတ်ရတာဗျ။ မိန်းမက အလုပ်သွားတော့ အိမ်မှာ ကျွန်တော်က ကလေးထိန်း အနှီးလျှော်ရတယ်လေ။
မရယ်ပါနဲ့ မိတ်ဆွေ။ ပုခက်လွှဲတဲ့လက်ဟာ ကမ္ဘာကြီးကို ကိုင်လှုပ်နိုင်တယ်လို့ စာအုပ်ထဲမှာ ပါတယ်မဟုတ်လား။ ကျွန်တော်စိတ်ဆိုးလာရင် အကုန်ကိုင်လှုပ်ပစ်မိလိမ့်မယ်။
အောင်မျိုးသူလွင်
၁၄၊၀၆၊၂၀၁၅
No comments:
Post a Comment